დაბადების დღე და შვილიშვილის ნათლობა - ხელისუფლებისა და ოპოზიციის წევრების ზეიმი ტრაგედიის ფონზე

2023-08-07 15:02:51, 659 ნახვა

საზოგადოება

რაჭაში, ონის მუნიციპალიტეტის ტერიტორიაზე მდებარე კურორტ შოვში მომხდარი ტრაგედიის გამო, 7 აგვისტო საქართველოში გლოვის დღედ გამოცხადდა.

გლოვის დღის მიუხედავად, "მთავარი არხის" ინფორმაციით, გუშინ, 6 აგვისტოს "ნაციონალური მოძრაობიდან" აჭარის უმაღლესი საბჭოს დეპუტატი ლევან ანთაძე მახინჯაურის ერთ-ერთ რესტორანში შვილიშვილის ნათლობას, მარტვილის მერიისა და საკრებულოს თანამშრომლები კი, მარტვილის რესტორან "პლაზაში" დაბადების დღეს აღნიშნავდნენ.

შესაბამისი ვიდეოკადრები სოციალურ ქსელში გავრცელდა.

"ღონისძიება შვიდში გვქონდა დაგეგმილი, მაგრამ გლოვის დღის გამო, ერთი დღით ადრე გადმოვიტანეთ. სტუმრები მყავდა შორი გზიდან, ამიტომ გამასპინძლების გარეშე ნათლობა ვერ ჩაივლიდა. რესტორანში ჩვენს გარდა, სხვებიც იმყოფებოდნენ, შესაბამისად მუსიკის ფონზე ქეიფის მხოლოდ ჩვენზე გადმობრალება არ არის გამართლებული",- აცხადებს ანთაძე, როგორც ამას tv25 იტყობინება.

აღნიშნულ ინფორმაციაზე დასმული კითხვის პასუხად,"ნაციონალური მოძრაობის" თავმჯდომარემ, ლევან ხაბეიშვილმა განაცხადა, რომ "ნებისმიერი ქეიფი ასეთ დროს კატეგორიულად მიუღებელია".

"ასეთი გლოვის დღეებში, ჩემთვის კატეგორიულად მიუღებელია, ვინც არ უნდა იყოს ეს, რამე სახის ქეიფი. კიდევ ვამბობ, ეს არის უმძიმესი ტრაგედია ჩვენი ქვეყნისთვის, თითოეული ადამიანისთვის, როგორც ორი შვილის მამისთვის, უმძიმესი საყურებელია ამდენი ოჯახის გამწარება, ამდენი ადამიანის გამწარება, ამდენი საყვარელი ადამიანი დაკარგეს ოჯახებმა, მცირეწლოვანი ბავშვები. ყოველდღიურად სტრესის ქვეშ გვიწევს მოქალაქეებს ცხოვრება და ცალსახად მინდა ვთქვა, ნებისმიერი ქეიფი ასეთ დროს ჩემთვის არის კატეგორიულად მიუღებელი და ცხადია, ეს ვერცერთ შემთხვევაში ვერ გამართლდება",- თქვა ხაბეიშვილმა.

შეგახსენებთ, შოვში მეწყერი 3 აგვისტოს ჩამოწვა. ბოლო ოფიციალური მონაცემებით, სტიქიას 18 ადამიანი ემსხვერპლა, 16 პირი კი, ამ დრომდე დაკარგულად მიიჩნევა. სტიქიის ეპიცენტრიდან 200-ზე მეტი ადამიანის ევაკუაცია მოხდა.

Patreon P მხარი დაუჭირე "ექსპრესნიუსს" →

ავტორი: ექსპრესნიუსი,