„აშშ მიესალმება უკრაინის მიმართ საქართველოს მკაფიო მხარდაჭერას" - ამის თაობაზე საქართველოში აშშ-ს ელჩმა კელი დეგნანმა საქართველოს ვიცე-პრემიერთან, საგარეო საქმეთა მინისტრ - დავით ზალკალიანთან შეხვედრის შემდეგ განაცხადა.

ამერიკელმა დიპლომატმა ასევე ხაზი გაუსვა  საქართველოს მთავრობისა და ქართველი ხალხის მხარდაჭერას უკრაინის მიმართ, მათ შორის აღინიშნა უკრაინისთვის გაგზავნილი ჰუმანიტარული დახმარების, ისევე როგორც საქართველოში მყოფი უკრაინელების მიმართ აღმოჩენილი მხარდაჭერის მნიშვნელობა. „ასევე უნდა აღინიშნოს ქართველი ხალხის, ბიზნეს წრეებისა და მთავრობის მიერ უკრაინისთვის გაგზავნილი მნიშვნელოვანი დახმარება, ჰუმანიტარული დახმარების სახით,  ასევე  უკრაინელი მოქალაქეების, მათ შორის, თბილისში, საქართველოში მყოფი უკრაინელების მიმართ აღმოჩენილი მხარდაჭერა."- აღნიშნა კელი დეგნანმა.

აშშ-ს ელჩი ასევე მიესალმა საგარეო უწყების მხრიდან მრავალხმრივ და ორმხრივ ფორმატებში უკრაინის მიმართ გამოხატულ მხარდაჭერას:

„ჩვენ უაღრესად მივესალმებით მინისტრ დავით  ზალკალიანისა და საგარეო საქმეთა სამინისტროს მიერ რუსეთის აგრესიასთან დაკავშირებით  გაკეთებულ მნიშვნელოვან განცხადებებს, ასევე მათ მიერ გაჟღერებულ მკაფიო მხარდაჭერას ისეთი მრავალმხრივი ორგანიზაციების ფარგლებში, როგორიცაა გაერო, ეუთო, ევროპის საბჭო, სადაც საქართველოს მხრიდან უკრაინელი ხალხის  მხარდასაჭერად გაკეთდა ძალიან მნიშვნელოვანი განცხადებები."

კელი დეგნანის თქმით, რუსეთს არ გააჩნია უფლება ვეტო დაადოს  ისეთი ქვეყნების მომავალს, როგორიცაა უკრაინა და საქართველო.  „ჩვენ ერთიანნი ვართ იმ პრინციპებთან მიმართებაში, რომლებიც  ბოლო სამოცდაათის წლის განმავლობაში ევროპასა და ამერიკის შეერთებულ შტატებში  სტაბილურობას, უსაფრთხოებასა და კეთილდღეობას უზრუნველყოფს. რუსეთის მიმართ მკაფიო მესიჯი უნდა იყოს ის, რომ საერთაშორისო საზოგადოება ერთიანია რუსეთის არაპროვოცირებული აგრესიის წინააღმდეგ."  „- განაცხადა ამერიკელმა დიპლომატმა.

ამასთან, როგორც კელი დეგნანმა აღნიშნა ვაშინგტონში მის მიერ გამართულ შეხვედრებზე არაერთხელ გაჟღერდა  ძლიერი მხარდაჭერა საქართველოს ევროატლანტიკური გზის მიმართ და აღინიშნა ამ გზაზე სვლის გაგრძელების მნიშვნელობა.

მისივე თქმით, აშშ აგრძელებს მუშაობას და მჭიდრო კოორდინაციას საქართველოსთან.

ავტორი: ექსპრესნიუსი,

სოციალური ქსელები

ვისაუბრეთ ურთიერთობების პერსპექტივებზე – ბოჭორიშვილი აშშ-ს დროებით რწმუნებულს შეხვდა

დაჭრა 2 ადამიანი და ადგილიდან მიიმალა - გორში მომხდარზე შსს-მ 1 პირი დააკავა

თბილისში არასრულწლოვანმა, ცივი იარაღის გამოყენებით, ტაქსის მძღოლი დაჭრა - კონფლიქტი მგზავრობის საფასურის გამო მოხდა

საქართველოს პროკურატურა ალეკო ელისაშვილის წინააღმდეგ ახალ ბრალდებას ამზადებს