ავღანეთში ქართულმა კონტიგენტმა ჰუმანიტარული ოპერაცია ჩაატარა

2015-03-04 14:50:04, 2077 ნახვა

სამხედრო

ავღანეთში, ბაგრამის საავიაციო ბაზაზე დისლოცირებულმა ქართულმა კონტიგენტმა სამოქმედო რაიონში ჰუმანიტარული ოპერაცია ჩაატარა.

თავდაცვის სამინისტროს ინფორმაციით, მეხუთე ქვეითი ბრიგადის 51-ე ბატალიონის სამხედროებმა სოფელ მუსა ბალას მოსახლეობას საყოფაცხოვრებო ნივთები გადასცეს. 51-ე ბატალიონის მეთაური, ვიცე-პოლკოვნიკი კობა გრიგოლია ოპერაციაში პირადად იყო ჩართული. ღონისძიების ბოლოს, ქართული ბატალიონის მეთაური ადგილობრივ მოსახლეობას შეხვდა და რეგიონში არსებულ უსაფრთხოების გარემოზე ესაუბრა.

ჰუმანიტარული ოპერაცია ავღანეთის უსაფრთხოების ძალებთან და ამერიკელ საზღვაო ქვეითებთან ერთად დაიგეგმა და განხორციელდა. მსგავსი სახის ოპერაციები ხელს უწყობს ადგილობრივ მოსახლეობასა და კოალიციურ ძალებს შორის დადებითი ურთიერთობების ჩამოყალიბებას.

საქართველოს შეიარაღებული ძალების V ქვეითი ბრიგადის 51-ე ბატალიონი, „მტკიცე მხარდაჭერის“ მისიაში ამერიკელ საზღვაო ქვეითებთან ერთად, სრული სპექტრის ოპერაციებს ახორციელებს. მათი მთავარი ამოცანა ბაგრამის საავიაციო ბაზის უსაფრთხოების უზრუნველყოფაა.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან