ქუცნაშვილი: მშიშარა დეპუტატები, შეუთანხმებლად მიღებული გადაწყვეტილებები, ეს არაა დემოკრატია

2015-02-13 16:17:13, 598 ნახვა

პოლიტიკა

მშიშარა დეპუტატები, შეუთანხმებლად მიღებული გადაწყვეტილებები, განხილვის გარეშე ჩამოყალიბებული პოზიცია-ეს არ არის დემოკრატია,-ამის შესახებ საპარლამენტო უმრავლესობის წევრმა ზაქარია ქუცნაშვილმა კოალიცია "ქართული ოცნების" ცენტრალურ ოფისთან ჟურნალისტებს განუცხადა, სადაც ფრაქციის სხდომა მიმდინარეობს.
სხდომაზე ერთ-ერთ საკითხად უზენაესი სასამართლოს თავმჯდომარეობის კანდიდატურის შერჩევის პროცესთან დაკავშირებით საპარლამენტო უმრავლესობის მიერ გამოთქმულ პრეტენზიებსა და შემდეგ განვითარებულ მოვლენებს განიხილავენ.
აღსანიშნავია, რომ ქუცნაშვილმა საკუთარი კანდიდატურა უზენაესი სასამართლოს თავმჯდომარის პოსტზე დააყენა.
"ფაქტი დამდგარია. ამ ფაქტის სისწორეს პარლამენტის 20 წევრი ადასტურებს, უფრო მეტიც. ამიტომაც, წყარო პრობლემის არის ის ხალხი, რომელიც ასე შეუთანხმებლად და არაკოორდინირებულად იქცევა.ვინ არის ეს ხალხი, ამას გავარკვევთ და შესაბამისად ლოგიკურად დადგება ის საკითხი, რაც უნდა დადგეს. არავის არავის თანამდებობა არ წადია. ღმერთმა მოუმართოს ყველას ხელი, მაგრამ მშიშარა დეპუტატები, შეუთანხმებლად მიღებული გადაწყვეტილებები, განხილვის გარეშე ჩამოყალიბებული პოზიცია, - ეს არ არის დემოკრატია,“ - განაცხადა ზაქარია ქუცნაშვილმა.
ცნობისთვის, საქართველოს უზენაესი სასამართლოს თავმჯდომარის კანდიდატურის შერჩევის პროცესთან დაკავშირებით, გუშინ საპარლამენტო უმრავლესობის 19-მა დეპუტატმა განცხადება გაავრცელა. ისინი პრეზიდენტ მარგველაშვილთან კონსულტაციების შედეგად შეჯერებულ კრიტერიუმებს აპროტესტებენ და მიიჩნევენ, რომ კანდიდატურის არაკონსტიტუციური კრიტერიუმით შერჩევა ხდება. ამასთან, მათივე მტკიცებით, უზენაესი სასამართლოს თავმჯდომარეობის კანდიდატთა შერჩევის დამატებითი კრიტერიუმები უმრავლესობის ფარგლებში არც განხილული და არც შეთანხმებული არ ყოფილა. " უმრავლესობის წევრები ამის შესახებ პოსტ-ფაქტუმ ვიგებთ",-ნათქვამია განცხადებაში.