უსაფრთხოების რეჟიმის თანამშრომელთა 6 თვიანი სასწავლო პროგრამა დასრულდა

2015-09-15 12:43:52, 584 ნახვა

საზოგადოება

სასჯელაღსრულებისა და პრობაციის სასწავლო ცენტრში 6 თვიანი სასწავლო პროგრამა დასრულდა, რომლის მიზანსაც პენიტენციური სისტემის სამართლებრივი რეჟიმის განყოფილებისთვის კვალიფიციური კადრების მომზადება წარმოადგენდა.
სასჯელაღსრულებისა და პრობაციის მინისტრმა კახა კახიშვილმა და ევროპის საბჭოს ოფისის ხელმძღვანელმა საქართველოში, კრისტიან ურსემ პროგრამის მონაწილეებს გრძელვადიანი სასწავლო პროგრამის წარმატებით დასრულება მიულოცეს და სერტიფიკატები გადასცეს.
სასჯელაღსრულების სამინისტროს ინფორმაციით, „ევროპული ციხის წესების“ თანავტორის მიერ შემუშავებული თანამშრომელთა გადამზადების უპრეცედენტო პროგრამა ევროკავშირისა და ევროსაბჭოს ერთობლივი პროექტის „ადამიანის უფლებები და ჯანდაცვა ციხეებსა და სხვა დახურულ ინსტიტუციებში“ მხარდაჭერით უკვე მეორედ ჩატარდა.
სამართლებრივი რეჟიმის 25 თანამშრომელი 6 თვის განმავლობაში სასჯელაღშრულებისა და პრობაციის სასწავლო ცენტრსა და პენიტენციურ დაწესებულებებში თეორიულ მომზადებასა და პრაქტიკულ სწავლებას გადიოდა.
„სასწავლო პროგრამის უნიკალურობა მასში მენტორების ჩართვამაც განაპირობა : დაწესებულების რეჟიმის გამოცდილი თანამშრომლები – მენტორები, ახალბედა კოლეგებს თავიანთ ცოდნასა და გამოცდილებას რამდენიმე კვირის განმავლობაში უზიარებდნენ“, – აცხადებენ სამინისტროში.
პენიტენციურ სისტემაში აღნიშნული პროგრამის განხორციელება 2014 წელს დაიწყო და საერთო ჯამში სამართლებრივი რეჟიმის 49 თანამშრომელი გადამზადდა.
როგორც სასჯელაღსრულების მინისტრმა კახა კახიშვილმა ჟურნალისტებს განუცხადა,სასჯელაღსრულებისა და პრობაციის სამინისტროში ამოქმედდება სამსახურში მიღების ახალი წესი.
მისივე თქმით, სამინისტროში დასაქმდებიან მხოლოდ ისინი, ვინც აღნიშნულ სასწავლო კურსს გაივლის და მათი ხელფასი სერტიფიკატის რანგზე იქნება დამოკიდებული.
„ჩვენ ვახორციელებთ გრძელვადიან სასწავლო პროცესს ჩვენი თანამშრომლებისთვის. ამაში გვეხმარება ევროკავშირი და ევროსაბჭო.ეს კეთდება იმისთვის, რომ ჩვენ ავამაღლოთ ჩვენი თანამშრომლების კვალიფიკაცია, ვინაიდან ჩვენი თანამშრომლების კვალიფიკაციაზეა დამოკიდებული იმ სტანდარტების დაცვა, რომლისკენაც ჩვენ მივდივართ. ამიტომ, ახლო მომავალში, სასჯელაღსრულების და პრობაციის სამინისტროში ამოქმედდება სამსახურში მიღების ახალი წესი და ასეთი სასწავლო კურსის გავლის გარეშე ვერც ერთი ადამიანი ვერ დაიწყებს მუშაობას ჩვენ სისტემაში. სერტიფიკატის რანგზე იქნება დამოკიდებული ჩვენი თანამშრომლის ხელფასი – იქნება 100%–იანი, მაღალი ხელფასი ექნება, იქნება გასვლით 50%–ზე მეტი, მაგრამ არა 100%, ექნება ნაკლები ხელფასი. ეს ყველაფერი იმისთვის გაკეთდა, რომ ჩვენმა თანამშრომლებმა მუდმივად იმუშაონ საკუთარ თავზე“, – აღნიშნა კახიშვილმა.