სახელმწიფო სერვისების განვითარების სააგენტოსა და "ლიბერთი ბანკს" შორის, დღეს, ურთიერთთანამშრომლობის მემორანდუმი გაფორმდა. 

მემორანდუმის თანახმად, სახელმწიფო სერვისები ხელმისაწვდომი გახდება ყველა იმ სოფელში, სადაც ლიბერთი ბანკი მომხმარებლებს „ლიბერთი ექსპრესის“ მობილური ფილიალებით ემსახურება. დოკუმენტს ხელი მოაწერეს სერვისების განვითარების სააგენტოს თავმჯდომარემ, შიო ხეცურიანმა და ლიბერთი ბანკის გენერალურმა დირექტორმა, გიორგი არველაძემ.

საქართველოს მასშტაბით, ლიბერთი ექსპრესის 70-მდე მობილური ფილიალი ყოველთვიურად  1100-ზე მეტ სოფელში 155,000-ზე მეტ მომხმარებელს ემსახურება. უახლოეს მომავალში, მომხმარებელს ასევე შესაძლებლობა ექნება საბანკო მომსახურების გარდა, სოფლიდან გაუსვლელად, ლიბერთი ექსპრესის მობილურ ფილიალებშივე მიიღოს ყველაზე მოთხოვნადი სახელმწიფო სერვისები, რაც მოიცავს სახელმწიფო სერვისების განვითარების სააგენტოს, საჯარო რეესტრის ეროვნული სააგენტოს, სოციალური მომსახურების საააგენტოს, ეროვნული არქივისა და შპს მექანიზატორის სერვისებს.

„სახელმწიფო სერვისების განვითარების სააგენტო მუდმივად ზრუნავს სახელმწიფო სერვისების ხელმისაწვდომობის გაზრდაზე. ჩვენი მიზანია, რაც შეიძლება მეტმა ადამიანმა შეძლოს სახელმწიფო სერვისების გამოყენება,  დაბრკოლებების გარეშე. ლიბერთი ბანკთან ერთად განხორციელებული პროექტიც სწორედ ამ მიმართულებით გადადგმული ნაბიჯია - სოფლის მოსახლეობას შესაძლებლობა მიეცემა სოფლიდან გაუსვლელად მიიღოს მისთვის საჭირო მომსახურება“, - განაცხადა სერვისების განვითარების სააგენტოს თავმჯდომარემ, შიო ხეცურიანმა.

"ლიბერთი ბანკის" გენერალური დირექტორის, გიორგი არველაძის, განცხადებით, მათი მიზანია, მომხმარებელს მაქსიმალური კომფორტი შეუქმნან და  მათ საჭიროებებზე მორგებული მომსახურება შესთავაზონ.

„ლიბერთი ბანკი საქართველოს მასშტაბით 1.5 მილიონზე მეტ მომხმარებელს 630-ზე მეტი ფილიალისა და წარმომადგენლობის საშუალებით ემსახურება. მათ შორის, ლიბერთი ექსპრესის 70-მდე მობილური ფილიალი 1100-ზე მეტ სოფელში ყოველთვიურად 155,000 -ზე მეტ მომხმარებელს სთავაზობს საბანკო მომსახურებას. ჩვენი მიზანია მომხმარებელს მაქსიმალური კომფორტი შევუქმნათ და  მათ საჭიროებებზე მორგებული მომსახურება შევთავაზოთ. მოხარული ვართ, რომ შესაძლებლობა მოგვეცა სახელმწიფო სერვისების განვითარების სააგენტოსთან ერთად განვახორციელოთ ეს მნიშვნელოვანი პროექტი, რომლის შედეგადაც მომხმარებელი სახელმწიფო სერვისებს ჩვენი არხების მეშვეობით მიიღებს და შესაბამისი მომსახურების საფასურის გადახდასაც ადგილზე შეძლებს“, - აღნიშნა  გიორგი არველაძემ.

პროექტი სახელმწიფო სერვისების განვითარების სააგენტოს ინოვაციური სერვისების ლაბორატორიის ინიციატივით ხორციელდება.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ALDE-მ საქართველოს შესახებ რეზოლუცია მიიღო

ავსტრიის საგარეო მინისტრი - ეს არ არის ბაზარი, სადაც თქვენს მთავრობას შეეძლო ევაჭრა, დაეწყო ჩვენთან მოლაპარაკება და ჩვენ შეგვესუსტებინა ჩვენი პოზიცია ფუნდამენტურ ღირებულებებზე - ეს, არასდროს მოხდება

ზელენსკი კონსტანტინოვკის აღებაზე - სიმართლე ძალიან განსხვავდება პუტინის სიტყვებისგან

უკრაინამ რუსეთის ბალტიის ფლოტს დაარტყა