5-6 მაისს აჭარაში საპასუხო ვიზიტით ნახიჩევანის ავტონომიური რესპუბლიკის დელეგაცია იმყოფება.

ნახიჩევანის უმაღლესი მეჯლისის თავმჯდომარეს ვასიფ თალიბოვს აჭარის მთავრობის თავმჯდომარემ ზურაბ პატარაძემ მთავრობის ადმინისტრაციაში უმასპინძლა.

შეხვედრაზე მთავრობის თავმჯდომარემ ნახიჩევანისა და აჭარის ავტონომიურ რესპუბლიკებს შორის სავაჭრო-ეკონომიკური კუთხით აქტიურ და ნაყოფიერ თანამშრომლობაზე ისაუბრა და ხაზი გაუსვა კულტურულ-ჰუმანიტრული მიმართულებით თანამშრომლობის გაღრმავებას. რეგიონის ხელმძღვანელმა აღნიშნა, რომ აზერბაიჯანი აჭარაში წამყვან პოზიციაზეა ეკონომიკურ პარტნიორებს შორის. 2015 წელს ბათუმში სოკარის ახალი წარმომადგენლობა გაიხსნა. გააქტიურდა სატრანსპორტო კომუნიკაციები, გაიზარდა ტვირთების გადაზიდვის ტრანზიტული ბრუნვა. დიდია სამომავლოდ თანამშრომლობის პოტენციალი სხვადასხვა სფეროების კუთხით.

ზურაბ პატარაძემ ასევე ისაუბრა საქართველოს დაწინაურებაზე ,,doing business"-ის მაჩვენებლით და ხაზი გაუსვა უსაფრთხო ბიზნეს გარემოს მქონე ქვეყნების ათეულში საქართველოს პოზიციის გაუმჯობესებას. განხილულ იქნა ნახიჩევანი-ბათუმის მიმართულებით პირდაპირი ფრენების შემოღების საკითხი, წამყვანი ტურ-ოპერატორების რეგიონში სტუმრობა და ტურისტული ნაკადების ზრდის ხელშეწყობა. სოფლის მეურნეობის სფეროში აზერბაიჯანული მხარე მზად არის ითანამშრომლოს მთიან აჭარაში მეცხოველეობის, სასათბურე მეურნეობების განვითარების ხელშემწყობ პროგრამებში. მხარეებმა ისაუბრეს ლოჯისტიკური ცენტრების შექმნასა და შექმნილი პროდუქციის რეალიზაციაზე.

ნახიჭევანის დელეგაციის მხრიდან შეხვედრას ესწრებოდნენ ნახიჭევანის ავტონომიური რესპუბლიკის მეწარმეთა კონფედერაციის თავმჯდომარე ვიუგარ აბასოვი და აზერბაიჯანის რესპუბლიკის საგანგებო და სრულუფლებიანი ელჩი საქართველოში დურსუნ ჰასანოვი.

უმაღლესი მეჯლისის თავმჯდომარესთან შეხვედრას აჭარის ა.რ. უმაღლესი საბჭოს თავმჯდომარე დავით გაბაიძე, აჭარის სოფლის მეურნეობის მინისტრი ლაშა კომახიძე, აჭარის ტურიზმისა და კურორტების დეპარტამენტის ხელმძღვანელი სულხან ღლონტი ესწრებოდნენ. შეხვედრაზე საუბარი შეეხო ასევე აჭარის ა.რ. საკანონმდებლო ორგანოსა და აღმასრულებელი ხელისუფლების მუშაობის წესსა და პრინციპებს.

,,აზერბაიჯანი ჩვენი მეგობარი და სტრატეგიულად მნიშვნელოვანი პარტნიორი ქვეყანაა. მზად ვართ ურთიერთობის გაღრმავებისთვის და სხვადასხვა სფეროში თანამშრომლობისთვის, გაგრძელდება გაცვლითი პროგრამები ავტონომიური რესპუბლიკების უნივერსიტეტებს შორის, გააქტიურდება ბავშვთა მკურნალობის პროგრამები ნახიჩევანის და აჭარის გამაჯანსაღებელ-სარეაბილიტაციო ცენტრებში, განვიხილეთ ბათუმი-ნახიჩევანის პირდაპირი ფრენების და მატარებლის დანიშვნის საკითხი", - აღნიშნა ზურაბ პატარაძემ.

(NS)

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

სტამბოლში სტენდაფ კომიკოსი ერდოღანზე ხუმრობის გამო დააკავეს

რუსეთის ბენზინგასამართ სადგურებზე რიგები ახლა კოსმოსიდანაც ჩანს

ნავთობგადამამუშავებელი ქარხნების დაბომბვებმა ნავთობისა და გაზის ბიუჯეტის შემოსავლები ტრილიონი რუბლით შეამცირა

ოკუპირებული ცხინვალის რეგიონის „საპრეზიდენტო“ არჩევნების ე.წ. ვადამდელი თარიღად 18 სექტემბერი დადგინდა