#რუსეთიყველგანოკუპანტია - ხვალ მოქალაქეები რუსეთის საელჩოსთან ალეპოში მიმდინარე გენოციდს გააპროტესტებენ

2016-12-14 22:32:07, 1103 ნახვა

საზოგადოება

#რუსეთიყველგანოკუპანტია #stopsyriangenocide - ამ მოწოდებებით ხვალ, საღამოს 7 საათზე, რუსეთის საელჩოსთან მოქალაქეები გააპროტესტებენ ალეპოში მიმდინარე გენოციდს და ყველა იმ დანაშაულს, რომელიც პუტინ-ასადის ალიანსის მიერ უკანასკნელი 5 წლის განმავლობაში განხორციელებულა.

ცნობისთვის, 12 დეკემბერს, სირიის სამთავრობო ჯარებისა და მისი მოკავშირეების (რუსეთი, ირანი) მიერ მოხდა ისტორიული ქალაქის ალეპოს დაკავება. იმავე დღეს, სოციალურ ქსელებში გავრცელდა მოსახლეობის მიმართვები, სადაც ისინი საუბრობენ სირიის სამთავრობო ჯარის მიერ რიგითი ადამიანების მასობრივ განადგურებაზე.

აქციის ორგანიზატორების თქმით, 2011 წელს დაწყებული სირიის კონფლიქტის დასრულება მრავალჯერ იყო შესაძლებელი, თუმცა ამას ხელს უშლის რუსეთი, გაეროს უშიშროების საბჭოს წევრი ქვეყანა, რომელიც სირიის პრეზიდენტის ბაშასრ ალ-ასადის ერთგული მოკავშირეა და უზრუნველყოფს მის სამხედრო კამპანიას, რომელიც მიმართულია, ძირითადად, მშვიდობიანი მოსახლეობისა და ამბოხებულების განადგურებაზე. ასადის მიერ არა ერთხელ მოხდა აკრძალული იარაღის გამოყენება, მათ შორის, ქიმიური და კასეტური იარაღის.