დაბალი რისკისა და გათავისუფლებისთვის მომზადების პენიტენციურ დაწესებულებებში მყოფ მსჯავრდებულებს, სურვილის შემთხვევაში, საშუალება მიეცემათ სასჯელის მოხდის პერიოდში, უმაღლესი განთლება დისტანციურად მიიღონ, - აღნიშნულის შესახებ სასჯელაღსრულებისა და პრობაციის მინისტრობის კანდიდატმა კახა კახიშვილმა პარლამენტის რიგგარეშე სესიაზე ისაუბრა, სადაც მთავრობისა და სამთავრობო პროგრამისთვის ნდობის გამოცხადების საკითხს განიხილავენ.

მინისტრობის კანდიდატმა ადამიანის უფლებათა დაცვის საპარლამენტო კომიტეტის თავმჯდომარის სოფიო კილაძის შეკითხვებს უპასუხა, რომელიც მსჯავრდებულთა მიერ უმაღლესი განათლების მიღებასა და პატიმრობის ალტერნატიული სასჯელების განვითარებას შეეხებოდა.

კახა კახიშვილის განმარტებით, მსჯავრდებულთათვის განათლების უფლების მინიჭების საკითხზე სასჯელაღსრულების უწყება განათლების სამინისტროსთან ერთად მუშაობს. აღნიშნული გათვალისწინებულია საკანონმდებლო ცვლილებათა პაკეტში, რომელიც სასჯელაღსრულების სამინისტრომ მთავრობას უკვე წარუდგინა და მისი ინიცირება მალე პარლამენტშიც მოხდება.

„დაბალი რისკის ან გათავისუფლებისთვის მომზადების დაწესებულებებში მყოფ მსჯავრდებულებს კანონპროექტის დამტკიცების შემთხვევაში,  უმაღლესი განათლების  დისტანციურად მიღების საშუალება მიეცემათ“, - განაცხადა კახა კახიშვილმა და არასაპატიმრო სასჯელის სახის - შინაპატიმრობის შესახებაც ისაუბრა, რომლის ამოქმედება სრულწლოვანი მსჯავრდებულებისთვის ასევე გათვალისწინებულია სამინისტროს მიერ მომზადებულ საკანონმდებლო ცვლილებათა პაკეტში.

„მოგეხსენებათ, რომ არასრულწლოვანთა მართლმსაჯულების კოდექსის საფუძველზე, უკვე ამოქმედდა შინაპატიმრობა არასრულწლოვანი მსჯავრდებულებისთვის. ამავდროულად, მზად არის ინიციატივა და პარლამენტის თანხმობის შემთხვევაში,  ჩვენ მზად ვართ აღვასრულოთ შინაპატიმრობის მოდელი სანქციის სახით სრულწლოვანი, ნაკლებად მძიმე კატეგორიის დანაშაულში მსჯავრდებულებისთვისაც“, - განაცხადა კახა კახიშვილმა და განმარტა, რომ ეს მოდელი პატიმრების რაოდენობის შემცირებას შეუწყობს ხელს.

ამასთან, მინისტრობის კანდიდატის განცხადებით, მთავრობის საპარლამენტო მდივნის ხელმძღვანელობით შექმნილი სამუშაო ჯგუფის ფარგლებში, მზადდება ახალი ინიციატივა, რომელიც აღკვეთის ღონისძიების სახით წინასასამართლო პრობაციის შემოღებას ითვალისწინებს.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

სტამბოლში სტენდაფ კომიკოსი ერდოღანზე ხუმრობის გამო დააკავეს

რუსეთის ბენზინგასამართ სადგურებზე რიგები ახლა კოსმოსიდანაც ჩანს

ნავთობგადამამუშავებელი ქარხნების დაბომბვებმა ნავთობისა და გაზის ბიუჯეტის შემოსავლები ტრილიონი რუბლით შეამცირა

ოკუპირებული ცხინვალის რეგიონის „საპრეზიდენტო“ არჩევნების ე.წ. ვადამდელი თარიღად 18 სექტემბერი დადგინდა