კობახიძე: გორში, „ნაციონალური მოძრაობის“ კანდიდატის აქტივისტი ჩვენს აქტივისტებს დაუპირისპირდა

2016-10-30 13:25:45, 676 ნახვა

პოლიტიკა

გორის რაიონში სოფელ სობისში, #45-ე საარჩევნო უბანთან მოხდა ინციდენტი. „ნაციონალური მოძრაობის“ კანდიდატის ბადრი ბასიშვილის, ერთ-ერთი აქტივისტი ალბერტ მერებაშვილი ჩვენ აქტივისტებს დაუპირისპირდა, - ამის შესახებ „ქართული ოცნების“ აღმასრულებელმა მდივანმა ირაკლი კობახიძემ ბრიფინგზე განაცხადა.

როგორც კობახიძემ აღნიშნა, მერებაშვილი არის კიკბოქსიორი და არის ბადრი ბასიშვილის "ზონდერ დაჯგუფების" ერთ-ერთი წევრი.

„ალბერთ მერებაშვილი იყო მისული საარჩევნო უბანთან. ეს ადამიანი არის თბილისის კუდ-ის ყოფილი უფროსის დისშვილი. ასეთი ტიპის ადამიანებთან გვაქვს საქმე, რაც სიტუაციას კარგად წარმოაჩენს. მან სცადა ჩვენი აქტივისტების პროვოკაციაზე გამოწვევა. საარჩევნო უბანთან ჩვენი აქტივისტები იყვნენ მობილიზებული. მერებაშვილმა ჩვენ აქტივისტებს ძალიან მძიმე ფორმით შეურაცხყოფა მიაყენა. საუბარია გინებაზე, ძალიან მძიმე ფორმით. ამას მოჰყვა ინციდენტი. ინციდენტი იყო ორმხრივი“, - განაცხადა კობახიძემ.

მისივე თქმით, პირველად ფიზიკურ დაპირისპირებაში მმართველი გუნდის აქტივისტებთან ალბერტ მერებაშვილი შევიდა.

„მან ფიზიკური შეურაცხყოფა მიაყენა ჩვენს ერთ-ერთ აქტივისტს. ამას ორმხრივი ჩხუბი მოჰყვა, რომლის შედეგადაც ორივე მხარის აქტივისტები დაშავდნენ. მათ შორის თავად ალბერტ მერებაშვილიც დაშავდა. ამის შემდგომ ალბერტ მერებაშვილის მამა, იმედი შიუკაშვილი მივიდა ადგილზე. ის შევიდა შელაპარაკებაში სამართალდამცავ ორგანოების წარმომადგენელთან, მათ მიაყენა ფიზიკური შეურაცხყოფა და წინააღმდეგო გაუწია. ამის საფუძველზე იმედი შიუკაშვილი სამართალდამცველებმა დააკავეს“, - აღნიშნა „ქართული ოცნების“ აღმასრულებელმა მდივანმა.

ირაკლი კობახიძემ კიდევ ერთხელ მოუწოდა მხარდამჭერებს, მსგავს ინციდენტებს თავი აარიდონ და ოპონენტებს პროვოკაციებში არ აყვნენ.

„მოვუწოდებთ ჩვენ აქტივისტებს, მაქსიმალურად შეიკავონ თავი ასეთ ინციდენტებში მონაწიელობისგან. არავითარ შემთხვევაში არ აყვნენ პროვოკაციას. როგორც კი ნახავენ, რომ ასეთი ტიპის პროვოკაციას აქვს ადგილი, ისინი მაშინვე უნდა დაუკავშირდნენ სამართალდამცავ ორგანოებს. ჩვენი აქტივისტების საქმე არ არის პროვოკაციებში მონაწიელობა. ასეთ სიტუაციებს სამართალდამცველებმა უნდა მიხედონ და ვითარება განმუხტონ“, - განაცხადა კობახიძემ.