ირაკლი აბესაძე: მერიაში თანამდებობაზე ანი მიროტაძის და კონკურსის გარეშე დაინიშნა

2015-03-11 13:01:20, 532 ნახვა

პოლიტიკა

საკრებულოს ფრაქცია „ნაციონალური მოძრაობა“ თბილისის მერიის ხელმძღვანელობას ნეპოტიზმში ადანაშაულებს.
როგორც აღნიშნული ფრაქციის წევრმა ირაკლი აბესაძემ საკრებულოში გამართულ ბრიფინგზე განაცხადა, დედაქალაქის მერიის ადმინისტრაციის უფროსის მოადგილედ, საპარლამენტო უმრავლესობის წევრის ანი მიროტაძის და, თეა მიროტაძე დაინიშნა.
„ნეპოტიზმის კლასიკური შემთხვევაა, როდესაც ადმინისტრაციის უფროსის მოადგილედ, ისე, რომ კონკურსი არ გაუვლია, დაინიშნა „ქართული ოცნების“, საპარლამენტო უმრავლესობის წევრი ანი მიროტაძის და“, – აღნიშნა აბესაძემ.
გარდა ამისა, აბესაძის ინფორმაციით, დედაქალაქის მერიის ადმინისტრაციის უფროსი რევაზ ჩახავა, უსაფრთხოების სამსახურის უფროსის მოადგილედ დაინიშნა.
„ჩახავა, რომელიც ადმინისტრაციის უფროსი იყო და მისი გათავისუფლება მისი პირადი განცხადებიდან და მერიის განცხადებიდან გამომდინარე დაბრალდა ჩახავს ოჯახურ პირობებს, ვხედავთ, რომ ის იქნა დაქვეითებული და ინიშნება, უსაფრთხოების სამსახურის უფროსის მოადგილედ. გაუგებარია, თუ კი იგი ვერ ასრულდებდა ადმინისტრაციის უფროსის მოვალეობას, რატომ მოხდა მისი დანიშნვა თბილისის მერიაში სხვა თანამდებობაზე, ანუ რა მოტივაციით იქნა ის გათავისუფლებული“, – განაცხადა ირაკლი აბესაძემ.