ბუნდესტაგის წევრი: ჩვენ მტკიცედ ვუჭერთ მხარს საქართველოს მოსახლეობას, რომელიც უზარმაზარი რისკების მიუხედავად, დაუღალავად აგრძელებს ბრძოლას თავისუფლებისთვის

2026-03-05 13:24:31, 2478 ნახვა

პოლიტიკა

„საქართველოში ავტორიტარული მმართველები სამხრეთ კავკასიაში ოდესღაც „დემოკრატიის შუქურას“ ერთპარტიულ დიქტატურად აქცევენ და ქვეყნის ევროპულ მომავალს ანადგურებენ“, - წერს ბუნდესტაგის წევრი რობინ ვაგენერი სოციალურ ქსელ X-ზე.

ის კომენტარს აკეთებს გრანტების შესახებ კანონში საქართველოს პარლამენტის მიერ 4 თებერვალს მიღებულ ცვლილებებზე და მათ „დემოკრატიულ სამოქალაქო საზოგადოებასა და პოლიტიკურ ოპოზიციაზე კიდევ ერთ პირდაპირ თავდასხმას“ უწოდებს.

„გრანტების შესახებ კანონში ახალი ცვლილებების თანახმად, სამოქალაქო საზოგადოების ორგანიზაციებსა და საერთაშორისო პარტნიორებს შორის ნებისმიერი თანამშრომლობა მთავრობის წინასწარ დამტკიცებას ექვემდებარება და ფაქტობრივად ეჭვის თვალით უყურებენ.

უცხოური დაფინანსების მიმღებ პირებს რვა წლის განმავლობაში აეკრძალებათ რომელიმე პოლიტიკურ პარტიაში ან მოძრაობაში გაწევრიანება, რითაც ისინი პოლიტიკური კონკურენციიდან გამოირიცხებიან. ახალი სისხლის სამართლის დანაშაული - „კონსტიტუციური წესრიგის წინააღმდეგ მიმართული ექსტრემიზმი“ - იმდენად ბუნდოვნად არის განსაზღვრული, რომ „ქართული ოცნების“ პარტიის ლეგიტიმური კრიტიკაც კი შეიძლება მის ქვეშ მოექცეს.“ „დღეს საქართველოში მიღებული საკანონმდებლო ცვლილებები წარმოადგენს კიდევ ერთ პირდაპირ თავდასხმას დემოკრატიულ სამოქალაქო საზოგადოებასა და პოლიტიკურ ოპოზიციაზე. გარდა ამისა, საქართველოში 100-ზე მეტი ადამიანია დაპატიმრებული პოლიტიკურად მოტივირებული მიზეზების გამო, მათ შორის ისეთი ჟურნალისტები, როგორიცაა სახაროვის პრემიის ლაურეატი მზია ამაღლობელი, ასევე წამყვანი ოპოზიციური პოლიტიკოსები. „ქართული ოცნება“ სისტემატურად ცდილობს ქვეყანაში თავისი კრიტიკოსების დაშინებას, დაპატიმრებას და გაჩუმებას.

მოვიწოდებ საქართველოში ყველა პოლიტიკური პატიმრის დაუყოვნებლივ და უპირობოდ გათავისუფლებისკენ. ჩვენ მტკიცედ ვუჭერთ მხარს საქართველოს მოსახლეობას, რომელიც უზარმაზარი რისკების მიუხედავად, დაუღალავად აგრძელებს ბრძოლას თავისუფლების, დემოკრატიისა და თავისი ქვეყნის ევროპული მომავლისთვის“, - განაცხადა გერმანელმა პარლამენტის წევრმა.

The authoritarian rulers in Georgia are increasingly transforming what was once a democratic beacon of hope in the South Caucasus into a one-party dictatorship, thereby destroying the country’s European future.
The legislative amendments adopted today in Georgia constitute yet…
— Robin Wagener (@robinwagener) March 4, 2026