გიგი უგულავა: შვილების ნახვის გამო მზად ვარ, იგივე გავიარო

2015-02-16 18:36:10, 861 ნახვა

პოლიტიკა

გიგი უგულავას ადვოკატებმა დედაქალაქის ყოფილი მერისთვის აღკვეთი ღონისძიების გირაოთი შეცვლა მოითხოვეს.
უგულავამ კი, სასამართლო პროცესზე ამის არგუმენტად, მისი შვილების ნახვა დაასახელა, რისი საშუალებაც, მისივე თქმით პროკურატურამ არ მისცა.
ყოფილი მერის თქმით, თავისუფლებაში ყოფნის დროს მას უნდა საკუთარ შვილებს მისი ციხეში ყოფნის მიზეზები აუხსნას.
„რასაც გულწრფელად ვნანობ და რასაც დღეს მივხვდი, რაც უნდა გამეკეთებინა, იყო ის, რომ ამისთვის ჩემი შვილები შემეგუებინა. ამიტომ, ერთადერთი არგუმენტი, რის გამოც მე დღეს მინდა რომ ისინი ვნახო, არის ის, რომ ავუხსნა ეს ყველაფერი. დარწმუნებული ვარ, როდესაც მე მათ ავუხსნი, ისინი გაიგებენ და მერე მე ნებისმიერ გამოწვევას მშვიდად შევხვდები. ამის მცდელობა მე მქონდა, მაგრამ სამწუხაროდ საგამოძიებო მოქმედებების გამო, ვციტირებ პროკურატურას, ბავშვებთან შეხვედრის საშუალება არ მომეცა, არც მეუღლესთან. ერთადერთი რის გამოც მე მზად ვარ, თავიდან გავიარო ის წრე, და ვინც პატიმარი ყოფილა იცის, რომ ეს წრე თავიდან ძალიან ძნელი გასავლელია, მაგრამ მე ამაზე შეგნებულად მივდივარ ერთადერთი რამის გამო, შვილების გამო, რომ ვნახო ისინი და ეს ყველაფერი ავუხსნა“, – აღნიშნა უგულავამ.
ცნობისთვის, თბილისის საქალაქო სასამართლოში გიგი უგულავას სასამართლო პროცესი გაიმართა. დაცვის მხარემ უგულავასთვის აღკვეთის ღონისძიების გირაოთი შეცვლა მოითხოვა. თუმცა, გათავისუფლდება თუ არა თბილისის ყოფილი მერი გიგი უგულავა წინასწარი პატიმრობიდან 18 თებერვალს 13:00 საათზე გახდება ცნობილი.
მოსამართლემ ადვოკატების შუამდგომლობაზე გადაწყვეტილების მისაღებად დრო სწორედ 18 თებერვლამდე ითხოვა.