ბერბოკი - ბურთი „ოცნების“ პასუხისმგებელთა მოედანზეა - მათზეა დამოკიდებული, პოლიტიკური კრიზისის დასასრულებლად ყველაფერი გააკეთონ

2024-12-26 14:57:28, 538 ნახვა

პოლიტიკა

ბურთი „ქართული ოცნების“ პასუხისმგებელთა მოედანზეა - ახლა მათზეა დამოკიდებული, ყველაფერი გააკეთონ ღრმა პოლიტიკური კრიზისის დასასრულებლად, ნდობის აღსადგენად და ქართველ ხალხს რეალური პერსპექტივები შესთავაზონ,- ამის შესახებ გერმანიის საგარეო საქმეთა მინისტრმა, ანალენა ბერბოკმა განაცახდა.

როგორც ბერბოკმა აღნიშნა, „ქართული ოცნების“ ავტორიტარული პოლიტიკის გამო, ევროკავშირში საქართველოს გაწევრიანების პროცესის ფორმალური შეჩერების საკითხის განხილვა უწევთ.

„საქართველოს მოსახლეობის უმრავლესობას სურს, რომ მათმა ქვეყანამ გააგრძელოს ევროპული გზა. მათი ხმა არის პროევროპული პროტესტი. მაგრამ „ქართული ოცნება“ დაშინებით, ძალადობითა და წყლის ჭავლით რეაგირებს. თავის ანტიევროპული კურსით "ქართულმა ოცნებამ" პრაქტიკულად შეაჩერა საქართველოს ევროკავშირში გაწევრიანება. „ქართული ოცნების" ავტორიტარული პოლიტიკის გამო, ჩვენ ევროკავშირში ასევე გვიწევს განვიხილოთ საქართველოს გაწევრიანების პროცესის ფორმალური შეჩერება.

2023 წლის დეკემბერში საქართველოსთვის ევროკავშირის კანდიდატის სტატუსის მინიჭება რეფორმების მკაფიო დაპირებებს უკავშირდებოდა. ეს ყოველთვის ცხადი იყო „ქართული ოცნების“ პასუხისმგებელებისთვის. მაგრამ პროგრესის ნაცვლად, ჩვენ ვხედავთ საგანგაშო წარუმატებლობას: არჩევნები, რომელსაც მკვეთრად აკრიტიკებენ საერთაშორისო დამკვირვებლები, არაპროპორციული ძალადობა დემონსტრანტების მიმართ, ეგრეთ წოდებული „გამჭვირვალობის კანონი“ ან ლგბტქი უფლებების შეზღუდვა. „ქართული ოცნება“ ამით კარგავს ისტორიულ შესაძლებლობას, რომელსაც ევროკავშირი სთავაზობს ქვეყანას.

„ქართულმა ოცნებამ“ ბოლო კვირებში და თვეებში ქვეყანა უფრო და უფრო დააშორა ევროკავშირს, რითაც მასიურად საფრთხე შეუქმნა ათწლეულების მანძილზე გერმანიასთან საქართველოს პარტნიორობას. შედეგად, ჩვენ შევამცირეთ თანამშრომლობა ქვეყნის ხელისუფლებასთან და შევაჩერეთ 200 მილიონ ევროზე მეტი ღირებულების მხარდაჭერის პროექტები. ამავდროულად, ჩვენ განვიხილავთ შემდგომ ზომებს ჩვენს ევროკავშირის პარტნიორებთან, ქართველი ოფიციალური პირებისთვის უვიზო რეჟიმის გაუქმებიდან, მიზანმიმართულ სანქციებამდე. ბურთი „ქართული ოცნების“ პასუხისმგებელთა მოედანზეა. ახლა მათზეა დამოკიდებული, ყველაფერი გააკეთონ ღრმა პოლიტიკური კრიზისის დასასრულებლად, ნდობის აღსადგენად და ქართველ ხალხს შესთავაზონ რეალური პერსპექტივები - ევროკავშირში გაწევრიანების გზაზე დაბრუნებისთვის“,- განაცხადა ბერბოკმა.