ხიდაშელი: რუსეთის ელჩმა მითხრა, რომ ოქტომბრიდან პრორუსული ხელისუფლება მოვა

2016-02-27 21:56:49, 568 ნახვა

პოლიტიკა

''რუსეთის ელჩმა მითხრა, რომ ოქტომბრიდან პრორუსული ხელისუფლება მოვა'' - ამის შესახებ საქართველოს თავდაცვის მინისტრმა, თინათინ ხიდაშელმა განაცხადა. მისი თქმით, თავდაცვის მინისტრის პოსტზე მისი დანიშვნით ენმ-სა და პრორუსულ ძალებს თავგზა აებნათ.

''ნაციონალურ მოძრაობას ტვინი აერია იმით, რომ მე გავხდი თავდაცვის მინისტრი და დღემდე ვერ ეგუებიან ამას. მათ ეგონათ, რომ არგუმენტი გაუჩნდათ თავისუფალი დემოკრატების წასვლის შემდეგ, განსაკუთრებით თავდაცვის სამინისტროდან. უცბად აღმოჩნდნენ ხელცარიელები" - განაცხადა თინათინ ხიდაშელმა.

თავდაცვის მინისტრმა პრორუსულ ძალებზე და რუსეთის ელჩეც ისაუბრა და აღნიშნა, რომ მისი გამოსვლები საქართველოს ნატოში ინტეგრაციის შესახებ, რუსულ მხარეს აწუხებს. ხიდაშელი ამბობს, რომ რუსეთის ელჩის თქმით, ის ოქტომბრის შემდეგ აღარ იქნება თავდაცვის მინისტრის პოსტზე, რადგან, საქართველოში ხელისუფლება შეიცვლება და სათავეში პრორუსული ძალა მოვა.

''მე გასულ კვირას ეუთოში ვიყავი და რუსეთის ელჩმა, სრულიად პირდაპირ, ღია სხდომაზე, 56 ელჩის თანდასწრებით და თანამონაწილეობით, ძალიან მარტივი რაღაცები მითხრა. მან თქვა, რომ მე ძალიან ხშირად ვსაუბრობ NATO-ში ინტეგრაციაზე და ეს მას აწუხებს. მან თქვა, რომ მე და ჩემი მეუღლე ვართ ძალიან დიდი პრობლემა რუსეთისთვის. მან ეს ღიად თქვა, ღია სხდომაზე. იმიტომ, რომ ძალიან გამოკვეთილია ლიბერალ-დემოკრატიული ღირებულებებისადმი ჩვენი ერთგულება და რომ რუსეთისთვის ეს არ არის მისაღები. შემდეგ მან თქვა, რომ მე ოქტომბრის შემდეგ აღარ ვიქნები ხელისუფლებაში, იმიტომ, რომ მან ზუსტად იცის, რომ რუსეთის სწორი და ჭკვიანური მოქმედებების გამო საქართველოში ხელისუფლება შეიცვლება იმ ორიენტაციის სასარგებლოდ, რომელიც მათ უნდათ. ახლა გასაგებია, ეს ადამიანები, ვიღაცას მეტი ინტელექტი აქვს და ვიღაცას ნაკლები. ვიღაც ახერხებს ისე თქვას, რომ პირდაპირ ხელი ვერ დაადო რომ რუსი ხარ და ვიღაც ამას ვერ ახერხებს,'' - განაცხადა თავდაცვის მინისტრმა, თინათინ ხიდაშელმა ტელეკომპანია პირველისთვის მიცემულ ინტერვიუში.