IRI-ის კვლევა - გამოკითხულთა 45% მიიჩნევს, რომ საქართველოს ყველაზე მნიშვნელოვანი პრობლემა დღეს უმუშევრობაა

2021-08-02 17:35:42, 733 ნახვა

საზოგადოება

„საერთაშორისო რესპუბლიკური ინსტიტუტი - საქართველო“ 2021 წლის წინასაარჩევნო საზოგადოებრივი აზრის კვლევას აქვეყნებს.

კვლევის მიხედვით, კითხვაზე, თუ რა არის ყველაზე მნიშვნელოვანი პრობლემა, რომლის წინაშეც დღეს საქართველო დგას, გამოკითხულთა 45% აცხადებს, რომ ეს უმუშევრობაა, 20% მიიჩნევს, რომ ეს ცხოვრების დონე და მაღალი ფასებია, 8% კი თვლის, რომ სიღარიბე ქვეყნის უპირველესი გამოწვევაა.

რესპონდენტების აზრით, იგივე პრობლემები დგას როგორც მუნიციპალიტეტების, ასევე ოჯახების დონეზეც.

გარდა ამისა, გამოკითხულთა 67% მიიჩნევს, რომ ეონომიკური მიმართულება იქნება პარტიის წინასაარჩევნო პროგრამის იმ ორ კომპონენტს შორის, რომელიც სავარაუდოდ განსაზღვრავს ამომრჩევლის არჩევანს 2021 წლის თვითმმართველობის არჩევნებზე.

ცნობისთვის, კვლევა ჩატარდა 2021 წლის 15-30 ივნისის პერიოდში საერთაშორისო რესპუბლიკური ინსტიტუტის კვლევების ცენტრის სახელით, ბალტიის კვლევებისა და გელაპის ორგანიზაციის წარმომადგენლის დოქტორი რასა ალიშაუსკინეს მიერ, საველე სამუშაოები ჩატარდა „IPM“- ისმიერ. მონაცემები შეგროვდა სტრატიფიცირებული მრავალსაფეხურიანი შემთხვევითი შერჩევის მეთოდის გამოყენებით, პირისპირ ინტერვიუს გზით. შერჩევა მოიცავდა საარჩევნო ხმის უფლებისა და ასაკის მქონე 1500 რესპონდენტს. მონაცემები შეწონილ იქნა ასაკის, სქესის, რეგიონისა და დასახლების ზომის შესაბამისად. ცდომილების ზღვარი წარმოადგენს +/- 2.5 %, გამოპასუხების მაჩვენებელი - 74 %. კვლევის განხორციელება შესაძლებელი გახდა ამერიკელი ხალხის მხარდაჭერით, აშშ-ის საერთაშორისო განვითარების სააგენტოს მეშვეობით.

Patreon P მხარი დაუჭირე "ექსპრესნიუსს" →

ავტორი: ელენე გვიმრაძე, ექსპრესნიუსის რეპორტიორი 2018 წლიდან