საკონსტიტუციო სასამართლო: მოსამართლეთა და მათი ოჯახის წევრების უსაფრთხოება კითხვის ნიშნის ქვეშ დგება

2015-09-18 18:50:25, 701 ნახვა

საზოგადოება

საკონსტიტუციო სასამართლოს მოსამართლეებზე მიზანმიმართული ზეწოლა ხორციელდება.
ამის შესახებ საკონსტიტუციო სასამართლოს მიერ გავრცელებულ განცხადებაშია ნათქვამი.
განცხადების თანახმად, მოსამართლეთა საცხოვრებელ სახლებთან გაურკვეველი პიროვნებები იკრიბებიან და მათ მიმართ მუქარის შემცველი განცხადებები კეთდება.
„საქართველოს საკონსტიტუციო სასამართლოს პლენუმის მიერ 2015 წლის 16 სექტემბერს N3/2/646 გადაწყვეტილების (საქმეზე „საქართველოს მოქალაქე გიორგი უგულავა საქართველოს პარლამენტის წინააღმდეგ“, კონსტიტუციური სარჩელი N646) გამოცხადების შემდეგ განვითარებული მოვლენები მიუთითებს, რომ ზოგიერთი ჯგუფების მხრიდან ხორცილდება მიზანმიმართული ზეწოლა საკონსტიტუციო სასამართლოზე და ინდივიდუალურად მოსამართლეებზე.
მოსამართლეთა საცხოვრებელ სახლებთან იკრიბებიან გაურკვეველი პიროვნებები, მოსამართლეთა მიმართ კეთდება მუქარის შემცველი განცხადებები და ფიზიკური ანგარიშსწორების პირდაპირი მოწოდებები. კითხვის ქვეშ დგება საკონსტიტუციო სასამართლოს მოსამართლეთა და მათი ოჯახის წევრების უსაფრთხოება.
მივმართავთ სამართალდამცავ ორგანოებს იმოქმედონ კანონის მოთხოვნათა შესაბამისად, მოახდინონ ადექვატური რეაგირება და უზრუნველყონ საკონსტიტუციო სასამართლოს მოსამართლეებისა და მათი ოჯახის წევრების უსაფრთხოება“, – ნათქვამია საკონსტიტუციო სასამართლოს განცხადებაში.