EMC შსს-ს სისტემური რეფორმების გატარებისკენ მოუწოდებს

2020-07-14 14:05:10, 1950 ნახვა

საზოგადოება

ადამიანის უფლებების სწავლებისა და მონიტორინგის ცენტრი (EMC) ეხმიანება ბოლო პერიოდში მომხდარ ძალადობრივ კონფლიქტებს და შინაგან საქმეთა სამინისტროს სისტემური რეფორმების დროულად გატარებისკენ მოუწოდებს.

EMC-ის შეფასებით, ბოლო წლებში განხორციელებული ცვლილებები ვერ გახდა რეალურად დეპოლიტიზირებული, ანგარიშვალდებული და ადამიანის უფლებებზე ორიენტირებული სამართალდამცავი სისტემის ჩამოყალიბების საფუძველი.

„დღემდე, ძალადობრივ ფაქტებზე სახელმწიფოს რეაგირება მხოლოდ საპოლიციო რეპრესიული ინსტრუმენტების გამოყენებით, ცხადყოფს ქვეყანაში დანაშაულის პრევენციის სისტემის გაუმართავ მუშაობას. ახალგაზრდებს შორის მომხდარ ძალადობრივ დაპირისპირებებზე სახელმწიფოს მუშაობა მხოლოდ პოსტფაქტუმ რეაგირებით შემოიფარგლება. ყურადღების მიღმა რჩება სახელმწიფო უწყებათა ერთობლივი ძალისხმევით დანაშაულის გამომწვევ მიზეზებზე, კულტურულ და სოციალურ ასპექტებზე პრევენციული მუშაობა. ქვეყანაში სხვადასხვა ტიპის დანაშაულის თუ ძალადობრივი მენტალიტეტის წინააღმდეგ ფრაგმენტული და არაეფექტიანი მუშაობის, საგამოძიებო უწყებებთან მნიშვნელოვანი მოწმეების თანამშრომლობის მზაობის არარსებობის წინაპირობა ხდება. შესაბამისად, პოლიციის მიმართ არსებული დაბალი ნდობა მნიშვნელოვან დაბრკოლებას წარმოადგენს როგორც მოქალქეებისთვის, ისე თავად სამართალდამცავებისთვის, ჰქონდეთ ადეკვატური რეაგირება დანაშაულზე.

ყოველივე ზემოთთქმულის გათვალისწინებით, EMC მოუწოდებს ხელისუფლებას:

უზრუნველყოს სამართალდამცავი სისტემის პოლიტიკური ნეიტრალიტეტი, რაც წარმოადგენს აუცილებელ წინაპირობას უწყების მიმართ საზოგადოებრივი ნდობის გაზრდისათვის;

წარმოადგინოს კონკრეტული ხედვა და სამოქმედო გეგმა სისტემის შიგნით არსებული პრობლემების გადაჭრისთვის;

გაატაროს სისტემური რეფორმები უწყებაში რეპრესიული საპოლიციო მექანიზმების დანაშაულის პრევენციული მიდგომებით ჩანაცვლებისა და საზოგადოების ნდობის გაზრდის მიზნით“, - აცხადებენ ორგანიზაციაში.

Patreon P მხარი დაუჭირე "ექსპრესნიუსს" →

ავტორი: ცოტნე ტალახაძე, ექსპრესნიუსის რეპორტიორი 2019 წლიდან