ქობულეთში რუსთაველის ქუჩის რეაბილიტაცია ტურისტულ სეზონამდე დასრულდება

2018-03-21 13:05:41, 720 ნახვა

რეგიონი

აჭარის მთავრობის თვმჯდომარემ ქობულეთში რუსთაველის ქუჩის რეაბილიტაციის სამუშაოები მოინახულა.

ზურაბ პატარაძე მიმდინარე სამუშაოებს ქობულეთს მერთან მირიან ქათამაძესთან ერთად გაეცნო.

აჭარის მთავრობის პრესსამსხურის ინფორმაციით, ამ ეტაპზე რუსთაველის ქუჩის 7 კმ-იან მონაკვეთზე 5 სმ-იანი სისქის ასფალტის საფარის დაგება მიმდინარეობს. პროექტის განსახორციელებლად 1 500 000 ლარია გამოყოფილი. რუსთაველის ქუჩის რეაბილიტაციის ფარგლებში მოეწყო მიწისქვიშა კომუნიკაციები, სანიაღვრე არხები, ტროტუარები მოპირკეთდა დეკორატიული ფილებით.

„ქობულეთის სხვადასხვა ლოკაციებზე მიმდინარეობს გზის მოპირკეთება. ერთ-ერთი ყველაზე დიდი პროექტი არის რუსთაველის ქუჩა, 7 კილომეტრის სიგრძეზე იგება ახალი ასფალტის საფარი. ეს არის საკმაოდ მასშტაბური პროექტი და ძალიან გვახარებს, რომ კომპანია დროზე ადრე დაასრულებს სამუშაოებს. ეს იმას ნიშნავს, რომ ტურისტულ სეზონს შევხვდებით მოწესრიგებული ინფრასტრუქტურით“, - განაცხადა ზურაბ პატარაძემ.

ქობულეთის მერის მირიან ქათამაძის განცხადებით, იმისთვის, რომ მოწესრიგებული იყოს ინფრასტრუქტურა აქტიურ ტურისტულ სეზონამდე, სამუშაოები თითქმის 24 საათიან რეჟიმში მიმდინარეობს.

„ეს პროექტი ითვალისწინებს მთლიანად რუსთაველის ქუჩის კეთილმოწყობას, ეს არის მეორე ეტაპი, რომლითაც სარეაბილიტაციო სამუშაოები დასრულდება. ამავდროულად, ქალაქში აქტიურ ფაზაშია სხვადასხვა ინფრასტრუქტურული პროექტი, მიმდინარეობს კარიერის, ემტეესის და გელაურის უბნების კეთილმოწყობა. ეს ის უბნებია, რომელიც განთავსებულია ქალაქის პერიფერიებში და ამით ჩვენ ვაცხადებთ, რომ პრიორიტეტს წარმოადგენს არა მხოლოდ ქალაქის ცენტრალური უბნები, არამედ ქალაქის პერიფერია. იმისათვის, რომ წარმატებით განვითარდეს ქალაქის ზრდის და ურბანიზაციის პროცესი, ინფრასტრუქტურული სამუშაოების დაგეგმვას და წარმატებით განხორციელებას გადამწყვეტი მნიშვნელობა აქვს. ჩვენ აქტიურად განვახორციელებთ ხელშეკრულებით გათვალისწინებულ კონტროლს“, - აცხადებს მირიან ქათამაძე.

(NS)