მარგველაშვილი: კონსტიტუცია შეცდომებისგან დაზღვევის დოკუმენტი უნდა იყოს

2017-06-02 18:22:36, 2081 ნახვა

პოლიტიკა

საქართველოს პრეზიდენტი გიორგი მარგველაშვილი „თბილისის სტრატეგიული დისკუსის" ფარგლებში გამართულ მრგვალ მაგიდას დაესწრო, რომელიც პრეზიდენტის სასახლეში ეროვნული უშიშროების საბჭოს ორგანიზებით ჩატარდა.

ფორუმზე, რომელსაც ქართველი და უცხოელი ექსპერტები დაესწრნენ, პრეზიდენტი სიტყვით გამოვიდა და საქართველოს წინაშე მდგარ გამოწვევებზე და საკონსტიტუციო ცვლილებებთან დაკავშირებულ საკითხებზე ისაუბრა.

გიორგი მარგველაშვილის განცხადებით, საქართველოს წინაშე მდგარი გამოწვევებიდან გამომდინარე, კონსტიტუციაში უნდა შეიქმნას თავდაცვის კონცეფცია, ძალიან მკვეთრად გაწერილი სამოქმედო მანდატებით.

მან ასევე აღნიშნა, რომ უნდა არსებობდეს ამ გამოწვევებზე რეაგირებისორგანო და კითხვის ქვეშ არ უნდა დადგეს ამ ორგანოს ლეგიტიმურობა და პოლიტიკური უნარები და ამ პროცესში ჩართული უნდა იყოს სამოქალაქო კონტროლის ყველა მექანიზმი.

როგორც პრეზიდენტმა მრგვალ მაგიდაზე აღნიშნა, კონსტიტუციურ პროექტთან მიმართებაში როცა საუბარი მიდის მთავარსარდლისა და უშიშროების საბჭოს, შეიარაღებული ძალების, პარლამენტის ფუნქციებზე ამოსავალი უნდა იყოს არა ცალკეული ინსტიტუტების როლი, არამედ ის საფრთხეები, რაც დგას ქვეყნის თავდაცვისუნარიანობის წინაშე.

"თავდაცვის სისტემა უნდა იყოს ადეკვატური ქვეყნის წინაშე არსებული გამოწვევებისა და შესაბამისად, უნდა იყოს დაწერილი საქართველოს სპეციფიკიდან გამომდინარე, არამხოლოდ ზოგად პრინციპებზე დაყრდნობით“, – განაცხადა გიორგი მარგველაშვილმა.