ჩინეთის საგარეო მინისტრი: კონფლიქტი ჩრდილოეთ კორეის ირგვლივ შესაძლოა ნებისმიერ წუთს დაიწყოს

2017-04-14 17:44:25, 2494 ნახვა

მსოფლიო

კონფლიქტი ჩრდილოეთ კორეის ირგვლივ შესაძლოა ნებისმიერ წუთს დაიწყოს, - ამის შესახებ ჩინეთის საგარეო საქმეთა მინისტრმა ვან იმ განაცხადა.

"ბოლო დროის განმავლობაში უთანხმოება გამწვავდა. გვექმნება შთაბეჭდილება, რომ კონფლიქტი ნებისმიერ წამს შეიძლება განვითარდეს. თუ დაიწყება ომი, ყველა წააგებს - მოგებული ასეთ ვითარებაში ვერავინ იქნება", - აღნიშნა მინისტრმა და დასძინა, რომ ვინც კონფლიქტს დაიწყებს, საკუთარ თავზე ისტორიული პასუხისმგებლობა უნდა აიღოს და თავის ქმედებებზე პასუხი აგოს.

ცნობისთვის, მანამდე, 14 აპრილს, ტელეკომპანია NBC News-მა გაავრცელა ინფორმაცია, რომ ოფიციალური ვაშინგტონი მზადაა, ჩრდილოეთ კორეაზე სამხედრო იერიში მიიტანოს, თუ ფხენიანი კიდევ ერთ ბირთვულ ცდაზე წავა.

ამასთან, ამერიკის შეერთებული შტატების პრეზიდენტმა დონალდ ტრამპმა განაცხადა, რომ „ჩრდილოეთ კორეა პრობლემებს ეძებს“. მისივე თქმით, თუ ჩრდილოეთ კორეასთან პრობლემების მოგვარებაში ჩინეთი არ დაეხმარება, აშშ ამას დამოუკიდებლად გააკეთებს.

შეგახსენებთ, 2016 წლის დასაწყისში ჩრდილოეთ კორეამ 20-ზე მეტი ბალისტიკური რაკეტა გამოიყენა. ამასთან, 2 ბირთვული ცდა განახორციელა, რომლებიც გაეროს რეზოლუციის პირობებს არღვევს.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან