საყვარელიძე პროკურატურის განცხადებაზე: მშვილდ-ისრით ვაპირებდი წერილის გატყორცნას, შემდეგ მტრედებს გავატანე

2017-02-07 16:00:58, 2088 ნახვა

პოლიტიკა კომენტარი

„ეს არის უნამუსობა, არაკაცობა და სისხლის სამართლის დანაშაული“, - ასე გამოეხმაურა საქართველოს მთავარი პროკურორის ყოფილი მოადგილე დავით საყვარელიძე მოსამართლეებზე შესაძლო ზეწოლის შესახებ მთავარი პროკურატურის დღევანდელ განცხადებას.

„კომიკურიდან ტრაგიკულში გადავიდა ეს ყველაფერი. ძალიან მწყდება გული, რომ სიმწრით ნაშენები ქვეყანა და ინსტიტუტები პრიმიტიული, გონებაშეზღუდული და ბოროტი ადამიანების ხელში აღმოჩნდა. ერთი უზუსტობა დაუშვა პროკურორმა, თავიდან მშვილდ-ისრით ვაპირებდი წერილის ტყორცნას, შემდეგ მტრედებს გავატანე, მალე რომ მიეტანათ, ესეც უნდა დაემატებინათ და სრული სურათი დაიხატებოდა. უნამუსობა და სისხლის სამართლის დანაშაულია, რასაც ისინი აკეთებენ, ამას ჰქვია სისხლის სამართლის დანაშულის მასალების, მტკიცებულებების გაყალბება, ამაზეა ცალკე მუხლი, ადრე თუ გვიან ეს მუხლი უნდა გააქტიურდეს, რომ ეს სისტემები და ინსტიტუტები არ იყოს მართული პოლიტიკური ჯგუფების მიერ. სატელევიზიო კომუნიკაცია აქვს საქართველოს პროკურატურას ჩემთან. ფალსიფიცირებული, ბრიყვული თხზულებების მეშვეობით, შევარდნაძის დროინდელი უშიშროება და პროკურატურა ამას არ იზამდა, არ იკადრებდა. სამარცხვინოა, პირში ვეტყვი, როცა ვნახავ ყველა იმ პროკურორს, რომლებიც მე კარგად მიცნობენ, ვინც დღეს გამოაცხადა, მისი ხელმძღვანელები, შოთაძე, გაბიტაშვილი, ეს არის უნამუსობა, არაკაცობა და სისხლის სამართლის დანაშაული“, - განუცხადა დავით საყვარელიძემ „რუსთავი 2“-ს.

შეგახსენებთ, პროკურატურის მიერ გავრცელებული ინფორმაციის თანახმად, უზენაესი სასამართლოს მოსამართლეებმა - ბესარიონ ალავიძემ და პაატა ქათამაძემ წერილობითი შეტყობინებები დ. საყვარელიძის სახელით მიიღეს, თუმცა ამ ეტაპზე უწყება არ აკონკრეტებს, არის თუ არა ის მთავარი პროკურორის ყოფილი მოადგილე.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან