გიორგი პაპუაშვილი: მთავარი პროკურორი გამოძიების ობიექტურობაზე პირადად იღებს პასუხისმგებლობას

2016-07-28 18:00:14, 1234 ნახვა

სამართალი

„ღიად ვისაუბრეთ ყველა საკითხზე, მათ შორის იმაზეც თუ რატომ გვქონდა გამოძიების ობიექტურობასთან დაკავშირებით კითხვის ნიშნები“, - ამის შესახებ საკონსტიტუციო სასამართლოს თავმჯდომარემ გიორგი პაპუაშვილმა ჟურნალისტებს მთავარ პროკურატურის დატოვების შემდეგ განუცხადა.

პაპუაშვილის თქმით, შეხვედრა საკმაოდ ნაყოფიერი და კონსტრუქციული იყო.

„ირაკლი შოთაძისგან კონსტრუქციული მიდგომა იყო. ის გამოძიების ობიექტურობაზე პირადად იღებს პასუხისმგებლობას. ჩვენი საუბარი ეხებოდა იმას, რომ აქამდე გამოძიების ობიექტურობაზე ეჭვი არსებობდა. დავაყენეთ ის პრეტენზიები რომელიც გვქონდა . როცა ერთი წლის წინ პირველად დავიწყეთ მოსამართლეებზე ზეწოლის ფაქტებთან დაკავშირებით საუბარი, მაშინ ჩვენ წერილობით მიმართვაზე არანაირი პასუხი არ მიგვიღია. მეორეს მხრივ, მოსამართლეებმა, რომლებმაც ამ საქმესთან დაკავშირებით გარკვეული ინფორმაცია მიაწოდეს გამოძიებას მათი ოჯახის წევრების ან ახლობლების მიმართ შურისძიების საშიშროება არ უნდა არსებობდეს. გარდა ამისა , ჩვენ შევთანხმდით , რომ პირადად გვექნება კონტაქტი“, - განაცხადა გიორგი პაპუაშვილმა.

საკონსტიტუციო სასამართლოს თავმჯდომარის თქმით, მომავალი ყველას უჩვენებს თუ რამდენად ობიექტურად ჩატარდება გამოძიება. ამასთან, მან აღნიშნა , რომ რომ მოსამართლეების კონკრეტულ სახელებსა და გვარებს ვერ დაასახელებს, რადგან ეს მის კომპეტენციაში არ შედის.

„შოთაძესთან შევთანხმდით, რომ მოსამართლეები , რომლებიც კონკრეტულ ინფორმაციას მიაწვდიან გამოძიებას არ უნდა გრძნობდნენ შიშს, რომ მათ ოჯახებს რაიმე საფრთხე დაემუქრება“, - განაცხადა პაპუაშვილმა.

ცნობისთვის, საკონსტიტუციო სასამართლოს თავმჯდომარე მთავარი პროკურორს ირაკლი შოთაძეს შეხვდა. მან პროკურატურის შენობა უკვე დატოვა.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან