იუსტიციის სახლის „მოხალისეებს“ სერტიფიკატები გადაეცათ

2016-07-05 17:15:20, 681 ნახვა

საზოგადოება

იუსტიციის სამინისტროს სსიპ „დანაშაულის პრევენციის ცენტრისა" და იუსტიციის სახლის ერთობლივი პროგრამის - „მოხალისეს" - მონაწილეებს სერტიფიკატები გადაეცათ. პროგრამა ახალგაზრდებს საშუალებას აძლევს გარკვეული ტრენინგკურსის გავლის შემდეგ, გახდნენ იუსტიციის სახლის მოხალისე „თანამშრომლები“ და საჭიროების მიხედვით მოქალაქეების მიღებაში აქტიურად ჩაერთონ. იუსტიციის მინისტრის ინიციატივით გამოცხადებული უფასო პირადობის მოწმობების აქციის განმავლობაში, თბილისის იუსტიციის სახლის თანამშრომლებს მოქალაქეების მიღებაში 100 ახალგაზრდა ეხმარებოდა. აქციის განმავლობაში დღის პირველ ნახევარში „მოხალისეებად“ სტუდენტები, დღის მეორე ნახევარში კი - სკოლის მოსწავლეები „მუშაობდნენ“.

პროგრამა „მოხალისე“, უფასო აქციის მსგავსად, 26 მაისიდან 26 ივნისამდე მიმდინარეობდა. აქცია საქართველოს დამოუკიდებლობის აღდგენის 25-ე წლისთავს მიეძღვნა და მისი მიზანი პოტენციური ამომრჩევლების მონაცემთა დაზუსტება იყო. ამ ერთთვიანი უფასო აქციით 194 670-მა საქართველოს მოქალაქემ ისარგებლა. უფასო პირადობის მოწმობის აქციის შედეგად საარჩევნო სიაში უკვე 2 367 175 ზუსტი და გაუყალბებელი მონაცემია. უფასო აქციებთან დაკავშირებით, „მოხალისეები“ თბილისის გარდა ჩართულები იყვნენ სხვადასხვა ქალაქშიც.

ელექტრონული პირადობის მოწმობა ეროვნული, ევროპული და უსაფრთხო სახელმწიფო დოკუმენტია, რომელიც ხელს უწყობს საარჩევნო სიების სრულყოფას და მოქალაქის დაცულობას.
როგორც ცნობილია, იუსტიციის სამინისტროს სსიპ „დანაშაულის პრევენციის ცენტრის“ ერთ-ერთი მიმართულებაა ახალგაზრდებში სამართლებრივი და სამოქალაქო ცნობიერების ამაღლება, მოხალისეობრივი კულტურის განვითარების ხელშეწყობა. „დანაშაულის პრევენციის ცენტრის“ შესაბამისი ახალგაზრდული პროგრამები ქვეყნის მასშტაბით არსებულ იუსტიციის სახლებში მიმდინარეობს. მათში ჩართვა 14-დან 18 წლამდე ასაკის ახალგაზრდებს შეუძლიათ.