The Guardian-ის თანახმად, კრაკოვში გამართულ E5-ის შეხვედრაზე ევროკავშირის უმაღლესმა წარმომადგენელმა საგარეო და პოლიტიკის უსაფრთხოების საკითხებში კაია კალასმა თქვა, რომ ევროკავშირის მიზანია, მომავალ ორშაბათს რუსეთის წინააღმდეგ სანქციების მე-20 პაკეტი მიიღონ.

მიუხედავად იმისა, რომ ევროკავშირის ელჩები რუსეთის წინააღმდეგ სანქციების მე-20 პაკეტზე დღეს ვერ შეთანხმდნენ, კაია კალასი ამბობს, რომ სანქციების დაწესებას გეგმავენ. 

"სანქციები მოქმედებს.

ისინი სერიოზულ ზიანს აყენებს რუსეთის ეკონომიკას და ყოველი ახალი ზომა კიდევ უფრო უზღუდავს მას ომის დაწყების შესაძლებლობას. მოსკოვი უძლეველი არ არის. მისი არმია რეკორდულ დანაკარგებს განიცდის და მისი ეკონომიკა მძიმე ზეწოლის ქვეშაა.

მაგრამ პუტინი ამ ომს მანამ არ დაასრულებს, სანამ ხარჯები სარგებელს არ გადააჭარბებს და ეს არის ის წერტილი, რომელსაც ჩვენ უნდა მივაღწიოთ", - თქვა კაია კალასმა.

რადიო თავისუფლების ინფორმაციით, ევროკავშირმა რუსეთის სანქციებში მე-20 პაკეტში შესაძლოა საქართველოს ყულევის პორტიც შეიყვანოს.

რადიო თავისუფლება წერს, რომ მათმა ცენტრალურმა სამსახურმა მოიპოვა ევროკომისიის მიერ შემუშავებული შეთავაზება ევროკავშირის სანქციების მე-20 პაკეტთან დაკავშირებით.  

RFE/RL-ს თანახმად, სანქციების მე-20 პაკეტისთვის ევროკომისიის მიერ მომზადებული დოკუმენტი მოიცავს სიას, რომლითაც, სხვა საკითხებთან ერთად, მოთხოვნილია:

• რუსეთის "ჩრდილოვანი ფლოტის" დამატებით 43 გემის სანქცირება;
• რუსული თხევადი ბუნებრივი გაზით (LNG) დატვირთული ტანკერებისათვის ტექნიკური მომსახურების სერვისების აკრძალვა;
• რუსეთსა და "მესამე ქვეყნებში" ოთხ კონკრეტულ საპორტო ტერმინალთან ტრანზაქციების აკრძალვა - სწორედ ამ უკანასკნელშია გაყვანილი ყულევის პორტი. 

სანქცირების საჭიროება დოკუმენტში ასეა დასაბუთებული:

"[ყულევის პორტი] გამოიყენება ნედლი ნავთობის ან ნავთობპროდუქტების საზღვაო ტრანსპორტირებისთვის, რომლებიც წარმოებულია რუსეთში ან ექსპორტირებულია რუსული გემებით, რომლებიც იყენებენ არარეგულარულ და მაღალი რისკის მქონე გადაზიდვის პრაქტიკას". 

2025 წლის ოქტომბერში საქართველოში რუსულმა კომპანია რუსნეფტმა, შავი ზღვის სანაპიროზე, ყულევში ახალაშენებულ ნავთობგადამამუშავებელ ქარხანას ნავთობის პირველი პარტია მიაწოდა.

LSEG-ისა და ერთ-ერთი ტრეიდერის ინფორმაციით, ტანკერმა კაისერიმ 105 340 ტონა Siberian Light მარკის ნავთობი რუსეთის შავი ზღვის პორტიდან, ნოვოროსიისკიდან ჩაიტანა ყულევის ნავთობტერმინალში - 6 ოქტომბერს.

ყულევის ნავთობგადამამუშავებელმა ქარხანამ წელიწადში 1 200 000 ტონა ნავთობი უნდა გადაამუშაოს.

ავტორი: ექსპრესნიუსი,

სოციალური ქსელები

თაზო დათუნაშვილი რეჟიმის ინიციატივაზე აკონტროლოს ხალხი - ვინც მათ არ ეთანხმება, ყველას დეჰუმანიზაცია და დემონიზება ხდება პროპაგანდის ყველა საშუალებით

მიქელაძე - ავტორიტარული სისტემები სწორედ ასე აფართოებენ ძალაუფლებას, ჯერ ქმნიან ბუნდოვან და ფართო კატეგორიებს, შემდეგ კი მათზე ზედამხედველობის, მონიტორინგისა და დასჯის აპარატს აშენებენ

ონიანი - დაანონსებული მექანიზმი ცენზურის მექანიზმად გვევლინება და მას არაფერი აქვს საერთო დემოკრატიულ საზოგადოებაში ინტერესთა ბალანსთან

ოთხშაბათს და პარასკევს ივანიშვილის რეზიდენციასთან მოვაწყობთ ერთკაციან აქციებს - მშობლები