მერე შევაერთეთ - ჭიათურის მერია თავს იმართლებს

2025-10-26 20:49:58, 1095 ნახვა

პოლიტიკა

ჭიათურის მერია განცხადებას ავრცელებს მათივე Facebook-ზე გამოქვეყნებულ ფოტოსთან დაკავშირებით, რომელზეც საქართველოს რუკა ოკუპირებული რეგიონების გარეშე იყო

„გვსურს, გამოვეხმაუროთ კონკრეტული ადამიანების მხრიდან საქართველოს ილუსტრირებულ რუკასთან დაკავშირებულ ბინძურ სპეკულაციას, რომელიც სოციალურ ქსელში “ჭიათურობა 2025-ის” ფარგლებში ახალგაზრდების მიერ წარმოდგენილმა პერფორმანსმა გამოიწვია.
ეს იყო სკოლის მოსწავლეების მიერ მომზადებული დადგმა, რომლის დასასრულს, ბავშვებმა გაამთლიანეს საქართველო.
თეატრალური დადგმა მიზნად ისახავდა საზოგადოებისთვის კიდევ ერთხელ იმის შეხსენებას, რომ დამოუკიდებლობისა და ტერიტორიული მთლიანობისთვის ბრძოლა მუდმივი პროცესია.
საქართველოს რუკამ საბოლოოდ სწორედ ისეთი სახე მიიღო, რომელსაც ფოტოზე ხედავთ. აღნიშნული ფოტო სკოლის მოსწავლეების დადგმის დასრულების შემდეგ არის გადაღებული“ — წერია მერიის განცხადებაში.

დღეს ჭიათურაში ტრადიციული სახალხო დღესასწაული „ჭიათურობა 2025“ აღინიშნა. ღონისძიებაზე გამოფენილი იყო საქართველოს რუკა აფხაზეთისა და ცხინვალის რეგიონების გარეშე.

რუკის ფოტო ოფიციალურ გვერდზე თავად ჭიათურის მუნიციპალიტეტის მერიამ გამოაქვეყნა, საზოგადოების კრიტიკული რეაქციის შემდეგ კი „ჭიათურობა 2025“-ის შესახებ მთელი ალბომი წაშალა.

მერიისვე ინფორმაციით, ღონისძიებებს ჭიათურის მუნიციპალიტეტის მერი გივი მოდებაძე, ადგილობრივი ხელისუფლების წარმომადგენლებთან და მოწვეულ სტუმრებთან ერთად დაესწრო.

საქართველოს ტერიტორიული მთლიანობის პრინციპის დარღვევის ამსახველი ელექტრონული რუკის ან მისი ბეჭდური გამოცემის, აგრეთვე ასეთი გამოსახულების შემცველი სხვა საგნის დამზადება, წარმოება, რეკლამირება, გამოყენება, საქართველოში შემოტანა, გადაზიდვა, საქართველოდან გატანა ან რეალიზაცია სისხლის სამართლის წესით დასჯადია.

Patreon P მხარი დაუჭირე "ექსპრესნიუსს" →

ავტორი: ექსპრესნიუსი,