არჩილ გამზარდია - ეს არის იმ უზნეო და შვილთმოძულე მშობლების ბრძოლა შვილებთან, ვისაც შვილები არ უყვარს

2024-12-06 02:43:55, 559 ნახვა

საზოგადოება

"ეს არის იმ შვილთმოძულე მშობლების ბრძოლა შვილებთან, ვინც შვილებს არ უთმობს, ვისაც თავისგან განსხვავებული შვილები სძულს," - ეს სიტყვები თავის ფეისბუქ გვერდზე ანალიტიკოსმა პოლიტიკის მეცნიერებათა დოქტორმა არჩილ გამზარდიამ დაწერა.

"რაც ხდება დღეს რუსთაველზე, ეს არ არის თაობათა შორის ბრძოლა, ეს არის იმ უზნეო და შვილთმოძულე მშობლების ბრძოლა შვილებთან, ვისაც შვილები არ უყვარს, შვილებს არ ცნობს, შვილებისთვის არ ცხოვრობს.

ეს არის იმ შვილთმოძულე მშობლების ბრძოლა შვილებთან, ვინც შვილებს არ უთმობს, ვისაც თავისგან განსხვავებული შვილები სძულს, ვისაც შვილების თავისუფლებას შვილთა მონობა ურჩევნია და საკუთარ ამპარტავნებასა და პატივმოყვარეობაზე ფიქრობს მხოლოდ.

ეს არის შვილთმოძულე მშობლების ბრძოლა შვილებთან, რომლებიც თუ არ ეთანხმებიან შვილებს, შვილებს იკვეთავენ, შვილების ბედნიერებას მათი უბედურება ურჩევნია რომ წამოაძახოს, მშობლებს რადგან არ გვიჯერებდი, იმიტომ დაგემართა ასეო.

ეს არის იმ შვილთმოძულე მშობლების ბრძოლა შვილებთან, რომლებიც მორჩილ ან პირფერ-მოსარგებლე შვილებს დანარჩენ შვილებს უპირისპირებენ და შვილების ერთმანეთთან ომით იკვებებიან, შვილებს ერთმანეთის მიმართ სიძულვილს თესავენ, რომ დატკბნენ შვილების ურთიერთდაპირისპირებით.

ეს არის იმ შვილთმოძულე მშობლების ბრძოლა შვილებთან, რომლებიც საკუთარ თავს ღმერთებად და შეუცდომლებად განიხილავენ შვილებთან და თაყვანისცემას ითხოვენ მათგან, რომლებიც არასდროს ფიქრობენ სინამდვილეში შვილებზე, რადგან მხოლოდ საკუთარი მეუფება აღელვებთ.

იმ შვილთმოძულე მშობლების ბრძოლაა შვილებთან, რომლებიც არასდროს ემადლიერებიან შვილებს და მხოლოდ აქეთ ითხოვენ მადლიერებას სულ რომ ცხოვრება გაუმწარონ, არასდროს უხდიან შვილებს ბოდიშს და იქით რომ პატიება სჭირდებოდეთ, შვილებს შეედავებიან, ბოდიში გვიხადეთ და დაგვემონეთო.

ეს არ არის თაობათა ბრძოლა, ეს შვილთმოძულე მშობლების ბრძოლაა შვილებთან." - დაწერა არჩილ გამზარდიამ.