კორძაია - მივმართავ შს მინისტრს, ჩვენი პარტიის წევრის, აზატ ქერიმოვის ცემასთან დაკავშირებით დაუყოვნებლივ დააკავონ მოძალადე [ვიდეო]

2024-10-26 13:18:47, 460 ნახვა

პოლიტიკა

მივმართავ შინაგან საქმეთა მინისტრს, ჩვენი პარტიის წევრის, აზატ ქერიმოვის ცემასთან დაკავშირებით დაუყოვნებლივ დააკავონ ის მოძალადე,- ამის შესახებ “ერთიანობა - ნაციონალური მოძრაობის“ ერთ-ერთმა ლიდერმა, თამარ კორძაიამ განაცხადა.

კორძაიას თქმით, “შინაგან საქმეთა მინისტრი ვახტანგ გომელაური იქნება პასუხისმგებელი, იმ უმოქმედობაზე, რასაც დღეს პოლიცია კანონდარღვევებზე ჩადის“

“ნაძალადევში მე-9 უბანზე ადამიანმა ხმა ორჯერ მისცა და ეს სისხლის სამართლის დანაშაულია. იგივე მოხდა კრწანისში, მე-4 უბანზე, სადაც პოლიცია გამოძახებულია 2 საათზე მეტია და ადგილზე არავინ არ მისულა.

მივმართავ შინაგან საქმეთა მინისტრს, რომ დღეს ადგილი აქვს დანაშაულის ფაქტებს საარჩევნო უბნებში. ასევე პერსონალურად გიორგი კალანდარიშვილი იქნება პასუხისმგებელი იმ დარღვევებზე, რაც ხდება საქართველოში საარჩევნო უბნებზე. ის, რაც მარნეულში ხდება არის სრული კატასტროფა. შევარდნაძის პერიოდის შემდეგ ასეთი რამ საქართველოში არ მომხდარა და გიორგი კალანდარიშვილს ვულოცავ ასეთი წარმატებული არჩევნების ჩატარებას.

მივმართავ შინაგან საქმეთა სამინისტროს, ჩვენი პარტიის წევრის აზატ ქერიმოვის ცემასთან დაკავშირებით დაუყოვნებლივ დააკავონ ის მოძალადე, რომელმაც ეს სასტიკი დანაშაული ჩაიდინა.

გარდა ამისა, მარნეულში 74-ე და 50-ე უბნებზე კომისიის წევრები ეხმარებიან და აფერადებინებენ ამომრჩევლებს საარჩევნო უბნებში კონკრეტულ პარტიას. ასევე გლდანში კომისიის წევრი სხვის ნაცვლად აძლევს ხმას. კონკრეტულად, როდესაც დამკვირვებელმა ჰკითხა ამომრჩეველს რატომ მალავდა ბიულეტენს, ის გაიქცა და შემდეგ თავად გაააფერა და ბიულეტენი თავად ჩააგდო ყუთში“,- განაცხადა კორძაიამ.