საქართველოს ტერიტორიული მთლიანობისთვის ბრძოლებსა და ISAF-ის საერთაშორისო მისიებში დაჭრილი ქართველი სამხედრო მოსამსახურეები მჯდომარე ფრენბურთში პროფესიონალურ მომზადებას ბრიტანეთის თავდაცვის სამინისტროს მწვრთნელთან, რიჩარდ ოზბორნთან გადიან.

ეს ბრიტანელი მწვრთნელის მეორე სამუშაო ვიზიტია საქართველოში. მან დაჭრილი ქართველი სამხედროები მარტში სან-დიეგოს საერთაშორისო შეჯიბრებებში მონაწილეობისთვის მოამზადა. პროფესიონალი მწვრთნელი წელს გუნდს ახალი მოთამაშეებით აკომპლექტებს და ქართველ სამხედროებს საერთაშორისო ჩემპიონატისთვის ამზადებს, რომელიც ამერიკის შეერთებულ შტატებში მაისში გაიმართება.

თავდაცვის სამინისტროში გამართულ მასტერკლასს თავდაცვის მინისტრის მოადგილე ანა დოლიძე, გენერალური შტაბის უფროსის მოადგილე, პოლკოვნიკი რომან ჯოხაძე და დიდი ბრიტანეთის თავდაცვის ატაშე, ვიცე-პოლკოვნიკი ნიკ ვილკესი დაესწრნენ. მათ განსაკუთრებით აღნიშნეს ქართველი სამხედროების მომზადება, შემართება და სულისკვეთება, რომელიც ნებისმიერი ასპარეზობისთვის მნიშვნელოვანია.

ქართველმა სამხედროებმა პირველობა უკვე მოიპოვეს სპორტის სხვა სახეობაში - მჯდომარე ფეხბურთში. საერთაშორისო შეჯიბრებები -"დაჭრილ მეომართა თამაშები" („WOUNDED WORRIERS GAMES“) მიმდინარე წლის 1-12 მარტს კალიფორნიის შტატის საზღვაო ქვეითთა ბაზა - პენდელტონზე გაიმართა.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ALDE-მ საქართველოს შესახებ რეზოლუცია მიიღო

ავსტრიის საგარეო მინისტრი - ეს არ არის ბაზარი, სადაც თქვენს მთავრობას შეეძლო ევაჭრა, დაეწყო ჩვენთან მოლაპარაკება და ჩვენ შეგვესუსტებინა ჩვენი პოზიცია ფუნდამენტურ ღირებულებებზე - ეს, არასდროს მოხდება

ზელენსკი კონსტანტინოვკის აღებაზე - სიმართლე ძალიან განსხვავდება პუტინის სიტყვებისგან

უკრაინამ რუსეთის ბალტიის ფლოტს დაარტყა