თბილისის მთავრობის დღევანდელი სხდომა წუთიერი დუმილით დაიწყო

2018-08-08 11:05:07, 741 ნახვა

პოლიტიკა

დედაქალაქის მთავრობის დღევანდელი სხდომა წუთიერი დუმილით დაიწყო. თბილისის მერმა კახა კალაძემ 2008 წლის აგვისტოს ომის ტრაგიკული მოვლენები გაიხსენა და აღნიშნა, რომ საქართველო აუცილებლად იქნება ერთიანი.

„დღეს, 8 აგვისტოა და პირველ რიგში, მინდა ჩვენი ქვეყნის უახლესი ისტორიის ყველაზე ტრაგიკულ მოვლენას გამოვეხმაურო. ტრაგიკულს თავისი შედეგებით, მასშტაბითა და იარებით, რომელიც ქვეყანამ ჯერ კიდევ ვერ მოიშუშა და რა თქმა უნდა, ვერც მოიშუშებს საქართველოს საბოლოო გამთლიანებამდე. უკვე ორ ათეულ წელზე მეტი გავიდა რუსეთის ფედერაციის მხრიდან ფართომასშტაბიანი სამხედრო ინტერვენციისა და აგრესიის დაწყების შემდეგ, რასაც არაერთი ადამიანის სიცოცხლე, მათ შორის, მშვიდობიანი მოსახლეობა შეეწირა. გაჩნდა საკუთარ სამშობლოში დევნილთა ახალი ნაკადი, რომლებიც სახლებში დაბრუნებისა და აფხაზ და ოს თანამოქალაქეებთან ერთად, მშვიდობიანი თანაცხოვრების იმედს არ კარგავენ“, - განაცხადა კახა კალაძემ.

დედაქალაქის მერმა და თბილისის მთავრობის წევრებმა რუსეთ-საქართველოს ომში ტრაგიკულად დაღუპულ მოქალაქეებს წუთიერი დუმილით პატივი მიაგეს.

„მტერი ძლიერია, მაგრამ ქვეყნის გაერთიანების სურვილი უფრო ძლიერია. ჩვენს ერთიანობის რწმენას ვერავინ და ვერაფერი შელახავს. ეს ომი, უდიდეს ტრაგედიასა და ტკივილთან ერთად, გმირობისა და თავდადების არაერთ ისტორიას ასახავს. ჩვენი ვალია, ამ ადამიანების ხსოვნა უკვდავყოთ. სწორედ ამიტომ, სხდომის დაწყებამდე, მინდა ყველას გთხოვოთ, წუთიერი დუმილით პატივი მივაგოთ დაღუპული გმირების ხსოვნას“, - აღნიშნა დედაქალაქის მერმა.

(NS)