2015-05-18 14:10:42, 610 ნახვა

---

მართლმსაჯულების რეფორმირებისთვის იუსტიციის სამინისტროს მიერ მომზადებულ კანონპროექტს მოსამართლეები ეწინააღმდეგებიან

საქართველოს იუსტიციის უმაღლესი  საბჭოს მდივანი ლევან მურუსიძე „საერთო სასამართლოების შესახებ“ საქართველოს ორგანულ კანონში განსახორციელებელ რამდენიმე ცვლილებას კატეგორიულად ეწინააღმდეგება. მართლმსაჯულების მესამე ეტაპის რეფორმირებისთვის საქართველოს იუსტიციის სამინისტროს მიერ მომზადებულ  საკანონმდებლო ცვლილებათა პაკეტს მართლმსაჯულების სახლში ამ წუთებში განიხილავენ.

ლევან მურუსიძის თქმით, მისთვის მიუღებელია, სასამართლოს თავმჯდომარეს უფლებამოსილება  ვადაზე ადრე შეუწყდეს. მისივე შეფასებით, ეს ცვლილება  დამოუკიდებელ და ძლიერ მართლმსაჯულებას ხელს შეუშლის.

„შემიძლია პირდაპირ გითხრათ, რომ რაც დადებითი განხორციელდა სასამართლო ხელისუფლებაში, სასამართლო გახდა უფრო დამოუკიდებელი სხვა აღმსასრულებელი ხელისუფლების რაღაც გარკვეული დამსახურება იყო. აღნიშნული კანონპროექტის შემოღებით, ეს შეიცვლება პირიქით.რაც შეეხება ვადაზე ადრე თავჯდომარეების უფლებამოსილების  შეწყვეტას, აქ არის ვენეცის კომისიის დასკვნა, რომ ეს არ გააკეთოთ, საკონსტიტუციო სასამართლოს გადაწყვეტილება ასრებობს, რომ ეს არ უნდა გავაკეთოთ, შესაბამისად, საქართველოში მოქმედი არასამთავრობო,  ან საერთთაშორისო ყველა ორგანიზაცია ამბობს, რომ ეს არ გავაკეთოთ. ეს არ წაადგება მართლმსაჯულების განვითარებას.ჩვენ ვდგავართ კარგ გზაზე და გვაქვს საშუალება,  რომ მივაღწიოთ დამოუკიდებელ, ძლიერ მართლმსაჯულებას და ეს ხელს შეუშლი“,-განაცხადა ლევან მურუსიძემ.

გარდა ამისა, ლევან მურუსიძე ინსპექტორის ინსტიტუტის შემოღებასაც ეწინააღმდეგება, რომლის ინიციატორიც უზენაესი სასამართლოა. ინსპექტორის ინსტიტუტი მოსამართლისთვის გარკვეულ საქმეებთან დაკავშირებით,  ახსნა-განმარტების ჩამორთმევას გულისხმობს.

„რაც შეეხება ინსპექტორის ინსტიტუტს, ეს არის წარმოუდგენელი ჩემთვის. როგორ შეიძლება ამ ინსტუტის შემოღება. იუსტიციის სამინისტროს კანონპროექტში ეს არ არის, ეს ინიციატივა უზენაესი სასამართლოდან წამოვიდა. ერთადერთი ორგანო, რომელმაც შეიძლება მოსამართლეზე დევნა განახორციელოს, ეს შეიძლება იყოს იუსტიციის უმაღლესი საბჭო, შემდგომ ეს გასაჩივრდეს.  ვინმე შემოვიტანოთ, ვისაც 5 წლიანი იურიდიული განათლება ექნება,  ვინმე ვისაც ექნება უფლება,  რომ ჩამოართვას ახსნა- განმარტება მოსამართლეებს, ანგარიში მოსთხოვოს რაღაც საქმეებთან დაკვაშირებით და ისეთ თემებთან, რაზეც საჩივარი შემოტანილი არ არის, ეს არის უკან დახევა და არ შეუწყობს ხელს იმ ტენდენციას, რაც მართლმსაჯულების გაძლიერების კუთხით ქვეყანაში მიმდინარეობს და როგორც იუსტიციის უმაღლესი საბჭო მდივანი,  ამას კატეგორიულად შევეწინააღმდეგები.წარმოუდგენელია, რომ ინსპექტორი, ვინმე გარეშე პირი,  რომელსაც თავისი აპარატი ეყოლება, ახსნა განმარტებები ჩამოართვას მოსამართლეს და განახორციელოს ე.წ. პროკურორის ფუნქცია სასამართლოს სისტემაში“,-განაცხადა ლევან მურუსიძემ.
მართლმსაჯულების გამოწვევების თაობაზე  შეხვედრა უზენაესი სასამართლოს თავმჯდომარე ნინო გვენეტაძე გახსნა. შეხვედრას ესწრებიან იუსტიციის უმაღლესი საბჭოს მდივანი ლევან მურუსიძე, საერთაშორისო და ადგილობრივი არასამთავრობო ორგანიზაციების წარმომადგენლები, ექსპერტები და მოსამართლეები. საკანონმდებლო ცვლილებათა პაკეტზე მსჯელობა ამ დრომდე გრძელდება. ცოტა ხნის წინ კი, კანონპროეექტის განხილვა ხმაურით მიმდინარეობდა. შეხვედრაზე მყოფ მოსამართლეთა უმრავლესობა იუსტიციის სამინისტროს მიერ ინიცირებულ კანონოპროექტს ეწინააღმდეგება.

---

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

---

დღის თემა

მთავარი თემა

ინტერვიუ - ექსკლუზივი