საქართველოს თავდაცვის მინისტრის პირველი მოადგილე დაჭრილი სამხედრო მოსამსახურეების მოსანახულებლად წეროვანის რეაბილიტაციის ცენტრს ეწვია.

თავდაცვის სამინისტროს ინფორმაციით, გოჩა რატიანი სამხედროებს გაესაუბრა, მხარდაჭერა აღუთქვა და საჩუქრად გენერალ გიორგი კვინიტაძის წიგნი „ჩემი მოგონებები“ გადასცა. წიგნები მიიღეს საჩუქრად ჯარისკაცების შვილებმაც. 

მინისტრის მოადგილესთან ერთად, რეაბილიტაციის ცენტრში  საქართველოს შეიარაღებული ძალების გენერალური შტაბის უფროსის მოადგილე, პოლკოვნიკი რომან ჯოხაძე და  სამედიცინო დეპარტამენტის უფროსი, პოლკოვნიკი მედეა ბეთაშვილი იმყოფებოდნენ.  

ჯარისკაცების მონახულების შემდეგ, გოჩა რატიანი ცენტრის სამედიცინო პერსონალს გაესაუბრა. მოგვიანებით, მან კომპლექსის საცხოვრებელ პირობები დაათვალიერა და ინფრასტრუქტურას გაეცნო.

ამჟამად, წეროვანის რეაბილიტაციის ცენტრში 2008 წლის აგვისტოს ომსა და ISAF-ის საერთაშორისო მისიაში დაშავებული 8  სამხედრო მოსამსახურე, ოჯახებთან ერთად, რეაბილიტაციისა და დასვენების კურსს გადის. სამხედროები, ოჯახის წევრებთან ერთად, ცალკეული სამედიცინო ბატალიონის მედპერსონალის მუდმივი მეთვალყურეობის ქვეშ არიან.  მათ ასევე, ემსახურებიან ფსიქოლოგები და ფსიქიატრები. პერსონალი სამხედროებსა და მათი ოჯახის წევრებს 24 საათიან სადღეღამისო სამედიცინო მომსახურებას უწევს. საჭიროების შემთხვევაში, ხდება საჭირო პროფილის ექიმის ადგილზე გამოძახება.

წეროვანის რეაბილიტაციის ცენტრში საომარ მოქმედებებსა და სამშვიდობო მისიებში მონაწილეობის დროს დაშავებული სამხედრო მოსამსახურეები და მათი ოჯახის წევრები  ათდღიანი რეაბილიტაციისა და დასვენების კურსს გადიან. სამხედრო მოსამსახურეებისთვის კეთილმოწყობილია ორი შენობა. კომპლექსში დაშავებული ჯარისკაცებისა და მათი ოჯახის წევრებისთვის დასვენების კომფორტული პირობებია შექმნილი. ცენტრის ტერიტორიაზე განლაგებულია რეაბილიტაციის კურსისათვის საჭირო სხვადასხვა ინფრასტრუქტურული ობიექტი და კეთილმოწყობილი სასადილო.

როგორც თავდაცვის სამინისტროში აცხადებენ, პროცესი პერმანენტული ხასიათისაა და  ყველა დაშავებულ სამხედრო მოსამსახურესა და მათი ოჯახის წევრზე ვრცელდება. 2015 წელს ცენტრის გაფართოება, დაშავებული სამხედრო მოსამსახურეებისა და მათი ოჯახის წევრებისთვის სპორტული კომპლექსის  მშენებლობა იგეგმება.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

დიუშენის დაავადების მქონე ბავშვების მშობლები: „გადავარჩინოთ ჩვენი შვილები“

მდინარაძე: ტრადიციული ღირებულებები ქართული საზოგადოების მთავარი ორიენტირია

ცოტნე ივანიშვილი აცხადებს, რომ ძალადობას გმობს, თუმცა არ არის იმ პოზიციაში, რომ რაიმე ქმედითი გააკეთოს

საია: საქართველო 17 მაისს ლგბტქი უფლებებთან დაკავშირებული მწვავე დისკუსიებისა და კრიტიკის ფონზე ხვდება