ნატო-ს საპარლამენტო ასამბლეამ საქართველოს მხარდამჭერი დეკლარაცია მიიღო

2017-05-29 13:04:32, 2896 ნახვა

პოლიტიკა

ნატო-ს საპარლამენტო ასამბლეის საგაზაფხულო სესიის პლენარულ სხდომაზე საქართველოს მხარდამჭერი დეკლარაცია მიიღეს.

დელეგატებმა დოკუმენტს კენჭი დღეს უყარეს. დეკლარაციას მხარი საპარლამენტო ასამბლეის თითქმის ყველა წევრმა დაუჭირა.

აღსანიშნავია, რომ დეკლარაციაში დამატებები შევიდა, რომელიც პლენარულ სხდომაზე, ქართულმა მხარემ წარადგინა. კერძოდ, შესწორება მე-18 მუხლს ეხებოდა, სადაც საუბარია რუსეთის მიმართ მოწოდებებზე, რომ რუსეთმა საქართველოს ოკუპირებულ ტერიტორიებზე საერთაშორისო მონიტორები დაუშვას.

დოკუმენტის ავტორი შესწორებას დაეთანხმა და მასში იქნება ჩანაწერი - „უზრუნველყოს (რუსეთის ფედერაციამ) თავისუფალი გადაადგილება და ვაჭრობა ადმინისტრაციული საზღვრის გასწვრივ“.

პლენარულ სხდომაზე აღინიშნა, რომ ნატო-ს საპარლამენტო ასამბლეის მხრიდან დეკლარაციის მიღება საქართველოს მიმართ სოლიდარობის მაჩვენებელია.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან