შინაგან საქმეთა სამინისტროს ლატვიის შს მინისტრი, რიჰარდს კოზლოვსკისი ეწვია.

ლატვიელ კოლეგას საქართველოს შს მინისტრი, გიორგი მღებრიშვილი შეხვდა.

გიორგი მღებრიშვილმა ლატვიის შს მინისტრს საქართველოს ევროპულ და ევროატლანტიკურ სტრუქტურებში ინტეგრაციის პროცესში შეტანილი წვლილისა და მხარდაჭერისთვის მადლობა გადაუხადა: „სიმბოლურია, რომ თქვენი საქართველოში ვიზიტის დროს, მიმდინარე წლის 28 მარტს, ამოქმედდა საქართველოს მოქალაქეებისთვის შენგენის სივრცეში უვიზოდ მიმოსვლის რეჟიმი“, - განაცხადა საქართველოს შს მინისტრმა.

შეხვედრაზე მღებრიშვილმა განსაკუთრებული ყურადღება ტრანსნაციონალური დანაშაულისა და საერთო გამოწვევების წინააღმდეგ საერთაშორისო საპოლიციო თანამშრომლობის გაღრმავების მნიშვნელობაზე გაამახვილა. როგორც მან აღნიშნა, რამდენიმე დღეში საქართველოს შს სამინისტრო ხელს მოაწერს ევროპოლთან ოპერატიული და სტრატეგიული თანამშრომლობის შესახებ შეთანხმებას, რაც საქართველოსა და ევროკავშირის წევრი ქვეყნების სამართლდამცავ ორგანოებს შორის თანამშრომლობას ახალ, კიდევ უფრო მნიშვნელოვან ეტაპზე გადაიყვანს.

მხარეებმა საქართველოსა და ლატვიას შორის არსებულ მჭიდრო, პარტნიორულ ურთიერთობებზეც ისაუბრეს. როგორც შეხვედრაზე აღინიშნა, ორ ქვეყნის შს სამინისტროებს თავის კომპეტენციაში შემავალ თითქმის ყველა ძირითად სფეროში გაფორმებული აქვთ საერთაშორისო ხელშეკრულებები, რომელთა საფუძველზეც ეფექტური თანამშრომლობა ხორციელდება. საქართველო და ლატვია მჭიდროდ თანამშრომლობენ ნატო-საქართველოს არსებითი პაკეტის ფარგლებშიც, კერძოდ, ლატვიელი ექსპერტი ქართველ კოლეგებს სანაპირო დაცვის შესაძლებლობების განვითარებაში დიდ დახმარებას უწევს.

ლატვიის შს მინისტრის საქართველოში ვიზიტის ფარგლებში, მიმდინარე წლის 28 მარტს გიორგი მღებრიშვილმა და რიჰარდს კოზლოვსკისმა ხელი მოაწერეს ოქმს სასაზღვრო სფეროში თანამშრომლობის შესახებ შეთანხმებაში ცვლილებების შეტანის თაობაზე, რომელიც მხარეებს შორის მიგრაციის სფეროში თანამშრომლობასაც ითვალისწინებს.

შეხვედრაზე საქართველოს შს მინისტრმა ლატვიელ კოლეგას უწყებაში უკანასკნელ პერიოდში განხორციელებული და მიმდინარე რეფორმები გააცნო, მათ შორის, მაღალტექნოლოგიური და მულტიფუნქციური ერთობლივი ოპერაციების ცენტრი, ასევე, კრიმინალური პოლიციის რეფორმირების, საზოგადოებაზე ორიენტირებული პოლიციისა და ანალიზზე დაფუძნებული საპოლიციო საქმიანობის პროექტები.

მხარეები საქართველოსა და ლატვიის შს სამინისტროებს შორის არსებული თანამშრომლობის კიდევ უფრო გაღრმავებაზე შეთანხმდნენ.

(NS)

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ყირიმში, ნავთობბაზისა და ბორნის დაბომბვის შემდეგ, მათ შეწყვიტეს საწვავის გაყიდვა და დახურეს ქერჩის გადასასვლელი

აფხაზეთის საოკუპაციო რეჟიმი - თბილისიდან მშვიდობა მხოლოდ ძალის გამოუყენებლობის შესახებ შეთანხმებაა

ალბანეთში ათიათასობით ადამიანმა კუშნერ-ივანკა ტრამპთან დაკავშირებული კურორტის წინააღმდეგ საპროტესტო აქცია გამართა

მოვითხოვთ, 4 ოქტომბრის საქმის საფუძვლიან და ობიექტურ გადახედვას - მეცნიერებათა აკადემია