თბილისის მერის მოადგილე ირაკლი ლექვინაძე „ბავშვთა სამყაროს“ მიმდებარე ტერიტორიაზე არსებული ქვედა ბაზრობის მოვაჭრეების 3 წარმომადგენელს შეხვდა.

დედაქალაქის მერიაში გამართულ შეხვედრაზე დაზარალებულებმა მერიის პოზიცია კიდევ ერთხელ მოისმინეს და არსებული გარემოებების გადაჭრის გზებზე მერის მოადგილეს საკუთარი ხედვები გააცნეს.

ირაკლი ლექვინაძის თქმით, ამ დროისათვის, სხვადასხვა უწყებების წარმომადგენლებით დაკომპლექტებული სამუშაო ჯგუფი მეწარმეებისთვის ალტერნატიული ფართების შეთავაზებასთან ერთად, საბანკო დაწესებულებებთან შუამდგომლობისა და საგადასახადო ვალდებულებების შემსუბუქების საკითხებზე მსჯელობს. მისივე განცხადებით, უახლოეს დღეებში ბაზრობების დირექტორები თბილისის მერიას წარუდგენენ იმ ობიექტების ჩამონათვალს, სადაც დაზარალებულები შეღავათიანი პირობებით სარგებლობას შეძლებენ.

„ჩვენ გვქონდა შეხვედრა იმ მეწარმეებთან, რომლებიც „ბავშვთა სამყაროს“ ტერიტორიაზე ტანსაცმლითა და აქსესუარებით ვაჭრობდნენ. მათი ქონება, შესაძლოა ითქვას, სრულად არის განადგურებული. ჩვენ მათ გავაცანით ყველა ის შესაძლებლობა, რომელსაც თბილისის მერია სთავაზობს დაზარალებულებს სხვადასხვა უწყებებთან ერთად,  კერძოდ, ეს არის ალტერნატიული სავაჭრო წერტილები სხვადასხვა ბაზრობის ტერიტორიებზე, საბანკო ვალდებულებების რესტრუქტურიზაცია/გადავადება და საგადასახადო ვალდებულებების შემსუბუქება, რაზეც ფინანსთა სამინისტრო მსჯელობს. გარდა ამისა, ჩვენ  განვიხილავთ მათ მირ დაყენებულ მნიშვნელოვან საკითხებს,   აქტიურ კომუნიკაციაში ვართ დაზარალებულებთან, რათა გარკვეულ ჯგუფებს არ ჰქონდეთ ინფორმაციის არასწორი ინტერპრეტირების საშუალება. უწყებათაშორისი სამუშაო ჯგუფის შეხვედრებზე მიღებულ გადაწყვეტილებებთან დაკავშირებით ისინი მუდმივ რეჟიმში იქნებიან ინფორმირებულნი. კომპენსაციის გაცემის საკითხი მერიის მხრიდან არ განიხილება, რადგან ეს ადამიანები არიან მეწარმეები,  დღეს თბილისში 500 000-ზე მეტი მეწარმეა რეგისტრირებული და  თითოეული მათგანის ქონების დაცვის საკითხს, რაც რეალურად არის სადაზღვევო სისტემის ნაწილი და ამ სისტემით უნდა ხდებოდეს მათი ანაზღაურება, მერია კომპენსაციით ვერ მოაგვარებს“, - განაცხადა ირაკლი ლექვინაძემ.

"ბავშვთა სამყაროსთან" არსებული ქვედა ბაზრობის მეწარმეებმა მერის მოადგილეს, თავის მხრივ, ე.წ. „იაფი სესხის“ საკითხთან დაკავშირებით ბანკებთან მოლაპარაკებაში დახმარება სთხოვეს. აღნიშნულ საკითხს ირაკლი ლექვინაძე უახლოეს პერიოდში სამუშაო ჯგუფთან ერთად განიხილავს.  

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

თამარ კეკენაძე – არ გვაქვს მოლოდინი, რომ მოძალადე დეპუტატებს თავად „ოცნების“ მოძალადე სისტემა დასჯის

ივანიშვილის დეპუტატი ხამენეის დაკრძალვაზე ჩასვლაზე - რეგიონის ლიდერები ერთად დაესწრებიან ცერემონიალს და ამაში უცნაურს ვერაფერს ვხედავ

არასრულწლოვნების ტრეფიკინგის ბრალდებით სამი პირი დააკავეს- ბავშვებს მათხოვრობას აიძულებდნენ

2026 წლის I კვარტალში ევროკავშირი საქართველოს 2 060 მოქალაქეს დაატოვებინეს