დიმიტრი ქუმსიშვილმა “ბიზნეს დაჯილდოების“ მონაწილეებს გამარჯვება მიულოცა

2016-11-17 20:28:04, 1717 ნახვა

ეკონომიკა

დღესდღეობით ჩვენ მთლიან შიდა პროდუქტში მხოლოდ 21% გვაქვს მცირე და საშუალო ბიზნესის წილი, მაშინ, როდესაც ევროპის განვითარებულ ქვეყნებში მათი წილი 70%-ზე მეტია, - ამის შესახებ ეკონომიკისა და მდგარი განვითარების მინისტრმა დიმიტრი ქუმსიშვილმა "ბიზნეს დაჯილდოება 2016"-ის გამართულ ღონისძიებაზე ჟურნალისტებს განუცხადა.

როგორც მინისტრმა აღნიშნა, მცირე და საშუალო ბიზნესი დემოკრატიულ განვითარებასთან პირდაპირ კავშირშია.

"მცირე და საშუალო ბიზნესი დემოკრატიულ განვითარებასთან კავშირშია, იმიტომ რომ ძალიან მარტივია, როდესაც ქვეყანაში გყავს 50 ან 60 დიდი კომპანია და მათ მართავ და პირიქით, არის დემოკრატიული საფუძველი, როდესაც ქვეყანას აქვს 100 000 საშუალო კომპანია, რომელიც ქვეყანაში სიკეთისა და დოვლათის მაჩვენებელია და ამავე დროს არის დივერსიფიკაციის შესაძლებლობა. მინდა აღვნიშნო, რომ ჩვენი ქვეყნისთვის ეკონომიკური განვითარებისთვის, მნიშვნელოვანია მცირე და საშუალო ბიზნესის წილის ზრდა, ამიტომ მინდა მივულოცო დღევანდელი კონკურსის გამარჯვებულებს და მადლობა გადავუხადო "თიბისი" ბანკსა და "ჯეოსელს" "ბიზნეს დაჯილდოების" კონკურსის ჩატარებისთვის", - განაცხადა ქუმსიშვილმა.

მისივე თქმით, ბიზნეს დაჯილდოებაში კონკურსი 7 სხვადასხვა მიმართულებით განხორციელდა, რაც ეკონომიკური განვითარებისთვის ძალიან მნიშვნელოვანია.

ცნობისთვის, "თიბისი" ბანკისა და "ჯეოსელის" ერთობლივი პროექტი "ბიზნეს დაჯილდოება 2016" ფინალური ღონისძიება მიმდინარეობს, სადაც კონკურსის გამარჯვებულების ვინაობა დასახელდება. დაჯილდოების ცერემონიალს ესწრებიან ეკონომიკისა და მდგადი განვითარების მინისტრი დიმიტრი ქუმსიშვილი, მთავრობისა და ბიზნესის წარმომადგენლები, ასევე "ბიზნეს დაჯილდოება 2016"-ის მონაწილე კომპანიები.

აღსანიშნავია, რომ ეკონომიკის მინისტრი ცერემონიალის დროს ბიზნესის წარმომადგენლებს სიტყვით მიმართა.