თამარ ხიდაშელი: ჩემი საარჩევნო პლაკატები დააზიანეს და "პატრიოტთა ალიანსის" მაჟორიტარი კანდიდატის პლაკატებით დაფარეს

2016-09-19 10:17:29, 695 ნახვა

პოლიტიკა

საბურთალოს #4 საარჩევნო ოლქის მაჟორიტარი დეპუტატობის კანდიდატის თამარ ხიდაშელის განცხადებით, 18 სექტემბერს დიდ დიღომში, პეტრე იბერისა და მირიან მეფის ქუჩაზე, მისი საარჩევნო პლაკატები მიზანმიმართულად დააზიანეს და დაფარეს საარჩევნო სუბიექტის „დავით თარხან-მოურავი, ირმა ინაშვილი - საქართველოს პატრიოტთა ალიანსი, გაერთიანებული ოპოზიცია” ერთ-ერთი მაჟორიტარი კანდიდატის საარჩევნო პლაკატებით.

"აღნიშნული ქმედება ისჯება საქართველოს საარჩევნო კოდექსის 46-ე მუხლის , მე-71 ნაწილით, კერძოდ: „დაუშვებელია და ამ კანონით დადგენილი წესით ისჯება სააგიტაციო მასალის ჩამოხსნა, ჩამოხევა, დაფარვა ან დაზიანება, თუ ის აკრძალულ ადგილას არ არის განთავსებული“

ამავე კანონის მე-80 მუხლის პირველი ნაწილის მიხედვით, წინასაარჩევნო მოწოდებებისა და მასალების გავრცელებისთვის ხელის შეშლა ითვალისწინებს ფულად ჯარიმას 1000 ლარის ოდენობით",-ნათქვამია მის განცხადებაში.
თამარ ხიდაშელი „თავისუფალი და სამართლიანი არჩევნებისათვის უწყებათაშორის კომისიას” და თბილისის მერიის შესაბამის სამსახურს რეაგირებისთვის მიმართავს.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან