ცესკო უსკოს წარმომადგენლებთან შეხვედრას მართავს

2016-06-19 14:43:54, 783 ნახვა

პოლიტიკა

ცენტრალური საარჩევნო კომისია (ცესკო) აჭარის უმაღლესი საარჩევნო კომისიის (უსკო) წარმომადგენლებთან შეხვედრებს მართავს. ცესკო-ს ინფორმაციით, შეხვედრებზე, 2016 წლის 8 ოქტომბრის საქართველოს პარლამენტის და აჭარის უმაღლესი საბჭოს არჩევნების ორგანიზებაზე მსჯელობენ.

ორივე არჩევნებისთვის პროცესების ერთობლივი მართვისა და საქმიანობის კოორდინირების საკითხებს ცესკოს თავმჯდომარე თამარ ჟვანია უსკოს წარმომადგენლებთან ერთად განიხილავს. შეხვედრებში, ასევე მონაწილეობენ ცესკოს მდივანი გიორგი ჯავახიშვილი და სტრუქტურული დანაყოფების ხელმძღვანელი პირები.

არჩევნების ორგანიზებისთვის აუცილებელი ტექნიკური საკითხები, საკანონმდებლო პროცედურები, არსებული საჭიროებები და გამოწვევები - ეს იმ საკითხების არასრული ჩამონათვალია, რომლებზეც ცესკოს ხელმძღვანელი პირები უსკოს თავმჯდომარესა და წევრებთან ერთად მსჯელობენ.

ცესკოსა და უსკოს თანამშრომლობა მნიშვნელოვანი ფაქტორია საქართველოს პარლამენტის და აჭარის უმაღლესი საბჭოს არჩევნებისთვის ხელმისაწვდომი საარჩევნო გარემოს უზრუნველყოფისა და მაღალკვალიფიციური არჩევნების ადმინისტრირების პროცესში.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან