ნოდარ ხადური: უნდა დადგინდეს როგორ აღმოჩნდა კორცხელში ხელკეტები და რა მოხდა სინამდვილეში

2016-06-06 18:51:49, 1066 ნახვა

სამართალი

ფინანსთა მინისტრ ნოდარ ხადურის განცხადებით, რამდენადაც იცის, მართლაც არსებობს კორცხელში გადაღებული კადრები, სადაც ჩანს, თუ როგორ სცემენ უცნობი პირები ხელკეტებით სპორტსმენებს.

„მე რამდენადაც ვიცი, ასეთი კადრები მართლაც არსებობს და სწორედ ამიტომ, სასამართლოშია საქმე და ვფიქრობ, რომ სასამართლომ ობიექტური გადაწყვეტილება უნდა მიიღოს, როგორ აღმოჩნდა იქ ეს ხელკეტები და რა მოხდა სინამდვილეში”, - აღნიშნა ნოდარ ხადურმა.

კორცხელის ინციდენტში მონაწილე სპორტსმენების ადვოკატი ზურაბ ბელთაძე კორცხელში გადაღებულ ვიდეოკადრებს ასაჯაროებს, სადაც ჩანს, თუ როგორ სცემენ უცნობი პირები ხელკეტებით სპორტსმენებს.

"ამ ჩანაწერს ჩვენ წარვადგენთ როგორც მტკიცებულებას, ასევე გავაცნობთ ბრალდების მხარეს და საზოგადოებას. ამ ჩანაწერში ნათლად ჩანს, თუ როგორ სცემენ ხელკეტების გამოყენებით ქართული ოცნების აქტივისტებს, კერძოდ სპორტსმენებს, რომლებიც ბრალდებულები არიან სისხლის სამართლის საქმეზე ხულიგნობის ბრალდებით“, - განაცხადა ადვოკატმა.

შეგახსენებთ, კორცხელში მომხდარ ინციდენტში ბრალდებულ სპორტსმენებს გირაოს სახით 7 და 10 ათასი ლარი აქვთ შეფარდებული. წინასასამართლო სხდომა ზუგდიდის საქალაქო სასამართლოში 28 ივლისს გაიმართება.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან