„ჩატარებული გამოძიებით უტყუარად დადასტურდა, რომ აკრძალული ქიმიური ნივთიერების, ბრომობენზილ ციანიდის, იგივე „კამიტეს“ გამოყენებას ფიზიკურად ვერ ექნებოდა ადგილი, რამეთუ ეს ნივთიერება საქართველოში არ არსებობს, მისი შესყიდვა საქართველოს შინაგან საქმეთა სამინისტროს არასოდეს განუხორციელებია“, - ამის შესახებ თბილისის მერმა კახა კალაძემ სოციალურ ქსელში ვიდეო-მიმართვისას განაცხადა.

მისი თქმით, მეხუთე დღეა, ჩვენი საზოგადოება თვალს ადევნებს უცხოური სპეცსამსახურების მიერ ორგანიზებულ კამპანიას საქართველოს წინააღმდეგ, რომლის მიზანი ქვეყნის სტაბილურობის შერყევა და საქართველოს რეპუტაციის დაზიანებაა.

„სამწუხაროდ, როგორც აქამდე არაერთხელ გვინახავს, ამ ანტიქართულ კამპანიაში აქტიურად მონაწილეობენ საზოგადოებისთვის კარგად ცნობილი ოდიოზური პირები, როგორც ქვეყნის შიგნით, ასევე ქვეყნის ფარგლებს გარეთ. ბრიტანული მაუწყებლის BBC-ის მიერ მომზადებული რეპორტაჟი, რომელიც თავიდან ბოლომდე ვარაუდებსა და გამოგონილ ამბებზეა აწყობილი, გახდა ხელოვნური ტრიგერი პოლიტიკურად ანგაჟირებული ჯგუფებისთვის, რათა საქართველოს, ქართველი ხალხის წინააღმდეგ ახალი ჰიბრიდული ომი ეწარმოებინათ, დაეზაფრათ მოსახლეობა და გამაოგნებლად ცრუ ბრალდებით აჟიოტაჟი გამოეწვიათ როგორც ჩვენს ქვეყანაში, ასევე საერთაშორისო საზოგადოებაში.

ბრიტანული მაუწყებლის მიერ მომზადებული რეპორტაჟი არაერთ, დადასტურებულად ტყუილ ბრალდებებს შეიცავს, რომელთაგანაც ყველაზე მგრძნობიარე საკითხი გახლავთ აკრძალული  ქიმიური ნივთიერების, ბრომობენზილ ციანიდის, იგივე „კამიტეს“ თითქოსდა გამოყენების ფაქტი ძალადობრივი, კანონსაწინააღმდეგო აქციების დაშლის დროს. ჩატარებული გამოძიებით უტყუარად დადასტურდა, რომ აღნიშნული ნივთიერების გამოყენებას ფიზიკურად ვერ ექნებოდა ადგილი, რადგან ეს ნივთიერება საქართველოში არ არსებობს, მისი შესყიდვა საქართველოს შინაგან საქმეთა სამინისტროს არასოდეს განუხორციელებია“, - განაცხადა კახა კალაძემ.

მისივე თქმით, „კამიტე“ იმდენად მძიმე ტოქსიკური ნივთიერებაა, მწვავე გვერდით ეფექტებით, რომ მისი გამოყენების შემთხვევაში, აქციის მონაწილეთა ჯანმრთელობას წარუშლელი კვალი დაეტყობოდა და შესაძლოა, ლეტალური შედეგიც გამოეწვია, მაშინ, როდესაც ქიმიური ზემოქმედების შედეგად არსებული ჩივილებით სამედიცინო დაწესებულებისათვის აქციის არც ერთ მონაწილეს არ მიუმართავს.  

„ქიმიური ნივთიერება, რომლის გამოყენებაშიც ჯერ ბრიტანულმა მაუწყებელმა, ხოლო შემდეგ კონკრეტულმა დაინტერესებულმა პირებმა და კონტროლირებულმა მედიასაშუალებებმა საქართველოს ხელისუფლებას დასდეს ბრალი, ერთ-ერთ ყველაზე მძიმე ტოქსიკურ საშუალებას წარმოადგენს, რომელსაც თან ახლავს იმდენად მწვავე გვერდითი ეფექტები, რომ თეორიულად, მისი გამოყენების შემთხვევაში ძალადობრივი აქციის მონაწილეთა ჯანმრთელობას დაეტყობოდა წარუშლელი კვალი. უფრო მეტიც, „კამიტეს“ ზემოქმედება მაღალი ალბათობით გამოიწვევდა ლეტალურ შედეგს. ამის პარალელურად, საქმეში არ არსებობს არც ერთი დაზარალებული, კანონსაწინააღმდეგო აქციების არც ერთ მონაწილეს არ მიუმართავს სამედიცინო დაწესებულებისათვის ქიმიური ნივთიერების ზემოქმედების შედეგად არსებული ჩივილებით. საერთო ჯამში კი, ძალადობრივი აქციების პერიოდში, 2024 წლის 28 ნოემბრიდან 28 იანვრის ჩათვლით, სასწრაფოს სამედიცინო დახმარების ბრიგადების მიერ სტაციონარულ სამედიცინო დაწესებულებებში გადაყვანილ იქნა ორასამდე ადამიანი, მათ შორის, მსუბუქი ინტოქსიკაციით მხოლოდ 5 პირი, რომლებიც მეორე დღესვე გაეწერნენ სამედიცინო დაწესებულებიდან“, - განაცხადა კახა კალაძემ.

ავტორი: ექსპრესნიუსი,

სოციალური ქსელები

თბილისი პრაიდი: "ოცნებამ" სცადა, ქვიარ ადამიანები საზოგადოებრივი ცხოვრებიდან გავექრეთ

SJC: 17 მაისი საქართველოში „ოჯახის“ იდეის პოლიტიკური ინსტრუმენტალიზაციის სიმბოლური დღეა

ელენე ხოშტარია - ხალხის სიმრავლე და ვერც დრო, ვერ წაშლის 2013 წლის 17 მაისს ჩადენილ ბოროტებას

შიო მესამე - თუ ოჯახში ტრიალებს მძიმე ცოდვა, ისეთი როგორიც არის, მაგალითად, აბორტი, მაშინ ბედნიერებას ვერ ააშენებ, განწირულია ასეთი ოჯახი