2022-04-15 18:24:39, 1320 ნახვა

---

მარიამ ქვრივიშვილი: საქართველოში ოპერირებით არაერთი საერთაშორისო ავიაკომპანია ინტერესდება - ზაფხულის სანავიგაციო სეზონზე კვირაში 450 - მდე ფრენა შესრულდება

ეკონომიკისა და მდგრადი განვითარების მინისტრის მოადგილე მარიამ ქვრივიშვილი საავიაციო სექტორის 60-მდე წარმომადგენელს შეხვდა და მათთან დარგში არსებული ვითარება, გამოწვევები და მათი დაძლევის გზები განიხილა. შეხვედრას ორგანიზება გაუწია საქართველოს სავაჭრო სამრეწველო პალატის ავიაციის კომიტეტმა.

შეხვედრაში ასევე მონაწილეობდნენ სამოქალაქო ავიაციის სააგენტოს გენერალური დირექტორი ლევან კარანაძე, „საქართველოს აეროპორტების გაერთიანების" დირექტორი თამარ არჩუაძე, სავაჭრო-სამრეწველო პალატის პრეზიდენტი გიორგი პერტაია და ამავე პალატის ავიაციის კომიტეტის თავმჯდომარე გიორგი მოლოდინაშვილი.

მარიამ ქვრივიშვილის განცხადებით, საქართველოს საავიაციო სექტორი ერთ-ერთი პრიორიტეტული მიმართულებაა და მის სწრაფ აღდგენაზე მნიშვნელოვნად არის დამოკიდებული ეკონომიკის სხვა მიმართულებების, განსაკუთრებით კი ტურიზმის მდგომარეობა. მისი თქმით, მთავრობა და ეკონომიკის სამინისტრო რეგულარულად მართავს შეხვედრებს ბიზნესის დარგების წარმომადგენლებთან და მათთან ერთად განიხილავს ამა თუ იმ სექტორში არსებულ ვითარებას.

„დღეს საქართველოში ოპერირებით არაერთი საერთაშორისო ავიაკომპანია ინტერესდება და ზაფხულის სანავიგაციო სეზონზე, კვირაში 400-დან 450 ფრენამდე შესრულდება, რაც ხელს შეუწყობს საერთაშორისო მოგზაურების შემოყვანას ჩვენ ქვეყანაში. გარდა ამისა, საქართველოში კიდევ უფრო მეტად გავაძლიერებთ გადაზიდვების ინდუსტრიას, ხელს შევუწყობთ დასაქმებას და ავიაციის სფეროში მეტი კვალიფიციური კადრის არსებობას საქართველოში", - განაცხადა მარიამ ქვრივიშვილმა.

მინისტრის მოადგილემ დეტალურად განიხილა სამოქალაქო ავიაციის სექტორში არსებული გამოწვევები და ბიზნესის წარმომადგენლებს მათი გადაჭრის გზების ერთობლივი შემუშავება შესთავაზა. „ჩვენი მიზანია, კიდევ უფრო მეტად გავაძლიეროთ ავიაციის სექტორი ქვეყანაში. დღეს დარგის აღდგენის პოზიტიური დინამიკა სახეზეა, მაგრამ ჩვენი ინტერესია, მისი კიდევ უფრო მეტად გაძლიერება და განვითარება, რათა გვქონდეს მეტი პირდაპირი საჰაერო მიმოსვლა ჩვენთვის სამიზნე სტრატეგიულ ქვეყნებში," - განაცხადა მარიამ ქვრივიშვილმა.

ავიაციის კომიტეტის სხდომაზე ასევე განიხილეს კოვიდ-თან დაკავშირებული შეზღუდვების მოხსნის საკითხები. აღინიშნა, რომ ეკონომიკის სამინისტრო განაგრძობს დარგობრივ შეხვედრებს ბიზნესთან და მათთან დიალოგის გზით შექმნილი გამოწვევების დაძლევის გზებს განიხილავს.

---

ავტორი: NS (სტატია დაფინანსებულია),

---

დღის თემა

მთავარი თემა

ინტერვიუ - ექსკლუზივი