საქართველოს ახლო მომავალში იაპონიის საერთაშორისო თანამშრომლობის ორგანიზაციის პრეზიდენტი ეწვევა

2017-06-02 17:13:54, 2325 ნახვა

ეკონომიკა

საქართველოს საგარეო საქმეთა მინისტრმა ტოკიოში იაპონიის საერთაშორისო თანამშრომლობის ორგანიზაციის პრეზიდენტთან შინიჩი კოტაოკასთან შეხვედრა გამართა, რომელიც ახლო მომავალში საქართველოს ვიზიტით ეწვევა.

ვიზიტის ფარგლებში თბილისში საზეიმოდ გაიხსნება JICA-ს რეგიონალური ოფისი.

მინისტრმა მადლობა გადაუხადა იაპონურ მხარეს, კონკრეტულად კი JICA-ს წარმატებული თანამშრომლობისა და იმ საქმიანობისთვის, რასაც ორგანიზაცია საქართველოში დამოუკიდებლობის აღდგენის დღიდან ეწევა.

JICA–ს პრეზიდენტის განცხადებით, იაპონიისთვის მნიშვნელოვანია დაეხმაროს საქართველოს მისი აღმშენებლობის გზაზე.

მან გამოხატა მზადყოფნა გააგრძელოს საქართველოსთან თანამშრომლობა ინფრასტრუქტურული პროექტების განხორციელების პროცესში, მათ შორის დასავლეთ-აღმოსავლეთ დამაკავშირებელი მაგისტრალის პროექტის განხორციელებაში.

საქართველოს საგარეო საქმეთა მინისტრის შეფასებით, მნიშვნელოვანი სიგნალია ის რომ იაპონიის საერთაშორისო თანამშრომლობის ორგანიზაცია რეგიონალურ ოფისს სწორედ საქართველოში ხსნის.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან