მერაბ ტურავა: პაპუაშვილისთვის არ მიგვინიჭებია მანდატი, რომ ასეთი განცხადებები გაეკეთებინა

2016-07-29 15:48:19, 1366 ნახვა

სამართალი

საქართველოს საკონსტიტუციო სასამართლოს თავმჯდომარის მხრიდან განცხადება მოსამართლეების ზეწოლის ფაქტებთან დაკავშირებით გაკეთდა ისე, რომ ამ თემაზე პლენუმი არ შეკრებილა, - ამის შესახებ საკონსტიტუციო სასამართლოს მოსამართლემ, მერაბ ტურავამ ჟურნალისტებს განუცხადა.

მოსამართლის თქმით, პლენუმის წევრებს არ ქონიათ შეხვედრა და მანდატი საკონსტიტუციო სასამართლოს თავმჯდომარისთვის არ მიუნიჭებიათ, რომ ასეთი საჯარო განცხადებით, ასეთი საჯარო ბრალდებით სხვადასხვა ორგანოებისათვის მიემართა.

“რაც შეეხება საკონსტიტუციო სასამართლოს ორ მოსამართლეს, რომლებმაც გუშინ განაცხადეს, რომ ამის შესახებ პლენუმის ფორმატში იყო მსჯელობა, ჩემთვის ეს ფაქტი არის უცნობი. ჩემთვის არც მოსამართლეთა ინდივიდუალური საუბრების დროს, არც პლენუმის ფორმატში, არც სხვაგვარი შეხვედრების დროს, არასოდეს არ ყოფილა მსჯელობა და საუბარი არც ერთ მოსამართლეზე განხორციელებული რაიმე ზეწოლის შესახებ. მე პირადად გამოვხატავ პროტესტს იმასთან დაკავშირებით, რომ იციან სხვებმა და მე არ ვიცოდი ამის შესახებ“, - აღნიშნა მერაბ ტურავამ.

რაც შეეხება წერილს, რომლითაც გიორგი პაპუაშვილის საკონსტიტუციო სასამართლოს ხუთმა მოსამართლემ მიმართა, როგორც ტურავამ აღნიშნა, პლენუმის წევრთა უმრავლესობა თავის განცხადებაში გამოხატავს პოზიციას, რომ ისინი საჯარო ბრალდების, საჯარო განცხადების თაობაზე ინფორმირებულები არ იყვნენ.

„მთელი საკონსტიტუციო სასამართლო არის დღეს ეჭვმიტანილი. ნებისმიერი გადაწყვეტილება, როგორიც არ უნდა იყოს ის, ჭეშნარიტების უმაღლესი საფეხურიც, საზოგადოების მხრიდან იქნება აღქმული, როგორც ზეწოლის შედეგად მიღებული გადაწყვეტილება. მე არავის არ ვადანაშაულებ, მე ვფიქტობ, რომ საკონსტიტუციო სასამართლოს წევრები უნდა იყვნენ ინფორმირებულები სასამართლოში მიმდინარე პროცესებთან დაკავშირებით. ალბათ უფრო სწორი იქნებოდა ის, რომ ჩვენ ვყოფილიყავით ინფორმირებული“, - აღნიშნა მერაბ ტურავამ.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან