პოლიტსაბჭოს გადაწყვეტილებით, ქორწინებასთან დაკავშირებით პარლამენტში საკონსტიტუციო ცვლილების ინიცირება მოხდება

2016-03-07 19:42:02, 528 ნახვა

პოლიტიკა

"ქართული ოცნების" ოფისში პოლიტსაბჭოს სხდომა დასრულდა, - ამის შესახებ ადგილიდან "ექსპრესნიუსისი" რეპორტიორი იტყობინება.

პოლიტსაბჭოზე კოალიციის წევრი სუბიექტები შეთანხმდნენ, რომ პარლამენტში მოხდება საკანონმდებლო ინიციატივა, რომლის მიხედვითაც საქართველოს კონსტიტუციაში ჩაიწერება, რომ ქორწინება ქალისა და მამაკაცის კავშირია.

ამ საკითხზე კოალიციაში აზრთა სხვადასხვაობა იყო. ამის საჭიროებას ვერ ხედავდნენ "რესპუბლიკელები". პარტიამ ამის შესახებ განცხადება დღესაც გაავრცელა, სადაც ნათქვამი იყო, რომ ამ საკითხის ინიცირება და შემდეგ საკონსტიტუციო ცვლილების ვერ მიღება ქორწინებას უფრო მეტად დააზარალებს.

ცნობისთვის, სამოქალაქო კოდექსში აქამდეც ეწერა, რომ ქორწინება ქალისა და მამაკაცის კავშირია. თუ საკონსტიტუციო მხარდაჭერას მოაგროვებენ, ეს ჩანაწერი საქართველოს კონსტიტუციაშიც ჩაიწერება.

საკონსტიტუციო უმრავლესობის მოსაპოვებლად 113 ხმაა საჭირო. ამ ეტაპზე კი საპარლამენტო უმრავლესობაში 85 დეპუტატი ირიცხება.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან