მედიის ინფორმაციით, უკრაინაში ჯო ბაიდენისა და პეტრო პოროშენკოს წინააღმდეგ სისხლის სამართლის ორი საქმე აღიძრა

2021-01-27 15:39:37, 1103 ნახვა

მსოფლიო

უკრაინაში ჯო ბაიდენისა და პეტრო პოროშენკოს წინააღმდეგ სისხლის სამართლის ორი საქმე აღიძრა.

აღნიშნული ინფორმაცია უკრაინულმა მედიამ ქვეყნის ყოფილი პრეზიდენტის, პეტრო პოროშენკოს ადვოკატზე დაყრდნობით გაავრცელა.

უკრაინული მედიის ცნობით, პეტრო პოროშენკოს ადვოკატმა „მეხუთე არხთან“ ინტერვიუში განაცხაად, რომ 22 იანვარს, ჯო ბაიდენის ინაუგურაციიდან 2 დღის შემდეგ, იყო დარეგისტრირებული ორი სისხლის სამართლის საქმე, რომლებიც ქვეყნის ყოფილი გენერალური პროკურორის, ვიქტორ შოკინის საქმიანობაში სავარაუდო ჩარევას უკავშირდება.

მისივე თქმით, აღნიშნული საქმეების წარმოება დეპუტატ ანდრეი დერკაჩის განცხადების საფუძველზე დაიწყო.

შეგახსენებთ, რომ დეპუტატმა ანდრეი დერკაჩმა სავარაუდოდ ჯო ბაიდენისა და პეტრო პოროშენკოს სატელეფონო საუბრების ოთხი ნაწილი გამოაქვეყნა, რაც მისი თქმით, საერთაშორისო კორუფციისა და უკრაინელი ექს-პრეზიდენტის ღალატს მოწმობდა.

Patreon P მხარი დაუჭირე "ექსპრესნიუსს" →

ავტორი: ელენე გვიმრაძე, ექსპრესნიუსის რეპორტიორი 2018 წლიდან