ნოტრ-დამის კოშკურის აღსადგენად საერთაშორისო კონკურსი გამოცხადდა

2019-04-17 15:38:05, 3400 ნახვა

მსოფლიო

პარიზის ღვთისმშობლის ტაძარში მომხდარი ხანძრის დროს ჩამონგრეული კოშკურის აღსადგენად საფრანგეთი საერთაშორისო კონკურსს გამოაცხადებს, - ამის შესახებ ქვეყნის პრემიერ მინისტრმა ედუარდ ფილიპმა განაცხადა. ინფორმაციას bfmtv ავრცელებს.

როგორც პრემიერმა განმარტა, კონკურსი კოშკურის აღდგენას შეეხება.

„საერთაშორისო კონკურსის საშუალებით დავადგენთ, საჭიროა თუ არა კოშკურის ზუსტად ერთი-ერთში აღდგენა, თუ ჯობს, რომ ტაძარს ახალი, თანამედროვე მოთხოვნების შესაბამისი კოშკურა გაუკეთდეს“, - განაცხადა ედუარდ ფილიპმა.

შეგახსენებთ, რომ ხანძარი ნოტრ-დამში 15 აპრილს გაჩნდა. მეხანძრეები რამდენიმე საათის განმავლობაში ცდილობდნენ ცეცხლის ჩაქრობას. ხანძრის შედეგად ტაძარი ნაწილობრივ განადგურდა და როგორც მოგვიანებით ოფიციალურმა პირებმა განაცხადეს, მის აღდგეს წლები დასჭირდება.

ცნობისთვის, ფრანგი მილიარდერი და კომპანია Kering-ის ხელმძღვანელი ფრანსუა-ანრი პინო ხანძრისგან დაზიანებული ნოტრ-დამის აღსადგენად 100 მილიონ ევროს გადარიცხავს. პინოს გარდა ნოტერ-დამის აღდგაში თავის წვლილს კომპანიათა ჯგუფის Louis Vuitton Moet Hennessy-ის მფლობელი ბერნარ არნოც შეიტანს. არნო ღვთისმშობლის ტაძრის აღსადგენად 200 მილიონ ევროს გამოყოფს.