ბათუმში, ტურიზმის სექტორის წარმომადგენლებს ქვეყანაში დაგეგმილი პროექტების შესახებ ინფორმაცია მიაწოდეს

2019-03-16 19:53:53, 2223 ნახვა

რეგიონი

დღეს, აჭარის მთავრობის თავმჯდომარე თორნიკე რიჟვაძე, ტურიზმის ეროვნული ადმინისტრაციის ხელმძღვანელი მარიამ ქვრივიშვილი და აჭარის ტურიზმის დეპარტამენტის თავმჯდომარე სულხან ღლონტი ტურიზმის სექტორის წარმომადგენლებს შეხვდნენ და ქვეყანაში ტურიზმის მიმართულებით დაგეგმილი პროექტების შესახებ მიაწოდეს ინფორმაცია.

„ტურიზმის მდგრადი განვითარება ნიშნავს იმას, რომ სწორი და ინტეგრირებული პოლიტიკის განხორციელებით ქვეყანა ეროვნულ, რეგიონულ და ადგილობრივ დონეზე გრძელვადიან პერიოდში იღებს ეკონომიკურ სარგებელს. საერთაშორისო ტენდენციების გაანალიზებით, შეიძლება ითქვას, რომ ტურიზმის მდგრადი განვითარება მაღალმთიანი რეგიონებიდან მიგრაციის მასშტაბს ამცირებს", - განაცხადა თორნიკე რიჟვაძემ.

ტურიზმის ეროვნული ადმინისტრაციის ხელმძღვანელმა, მარიამ ქვრივიშვილმა ისაუბრა ტურიზმის განვითარების სტრატეგიაზე და დამსწრე საზოგადოებას 2019-2025 წლების ტურიზმის სტრატეგია გააცნო.

აჭარის ტურიზმის დეპარტამენტმა ტურისტული პროდუქტების განვითარების და სერვისების გაუმჯობესების კონცეფცია მიმოიხილა, სეზონი შეაჯამა და მარკეტინგული სტრატეგიის შესახებ წარადგინა პრეზენტაცია.

ბათუმში გამართულ შეხვედრას ტურისტული სექტორის 100-ზე მეტი წარმომადგენელი დაესწრო. მათ შორის განთავსებისა და კვების ობიექტების, ტურისტული სააგენტოების, ტურისტული ობიექტების წარმომადგენლები და გიდები. შეხვედრას ასევე ესწრებოდა ბათუმის მერი ლაშა კომახიძე. პრეზენტაციების შემდეგ შეხვედრა კითხვა-პასუხის რეჟიმში გაგრძელდა.

(NS)