ბრიტანეთის ევროპულ საქმეთა მინისტრი: ქართველების სოლიდარობამ ჩემზე დიდი შთაბეჭდილება მოახდინა

2015-06-16 17:59:41, 408 ნახვა

პოლიტიკა

დიდი ბრიტანეთის ევროპულ საქმეთა მინისტრი დევიდ ლიდინგტონი თბილისში დატრიალებული სტიქიის გამო მწუხარებას გამოთქვამს. მინისტრმა საქართველოს საგარეო საქმეთა მინისტრს, თამარ ბერუჩაშვილს სამძიმრის წერილი გამოუგზავნა.
“ჩემთვის სამწუხარო იყო ინფორმაციის მიღება თბილისში მომხდარი საზარელი წყალდიდობის შესახებ, რომელმაც მოქალაქეების სიცოცხლე იმსხვერპლა, გაანადგურა საცხოვრებელი სახლები, პირადი საკუთრება, თბილისის ზოოპარკი და მისი ბინადარნი. მესმის თუ რაოდენ მძიმეა ეს ყველაფერი საქართველოსთვის და თბილისის მაცხოვრებლებისთვის.
დარწმუნებული ვარ საქართველოს მთავრობა ყველაფერს აკეთებს სტიქიის შედეგების აღმოფხვრისათვის და ტრაგედიით დაზარალებული ყოველი პირი დროულ მხარდაჭერასა და დახმარებას იღებს. ეს საქართველოს მოსახლეობას დამატებით ანუგეშებს ამ მძიმე წუთებში.
ჩემზე დიდი შთაბეჭდილება მოახდინა ამ ტრაგიკული მოვლენების ფონზე ქართველი ხალხის სოლიდარობამ. მათი ერთსულოვნება და თბილისის მაცხოვრებლების სამაშველო და გაწმენდით სამუშაოებში მონაწილეობა უზომოდ შთამბეჭდავია.
მინდა გულწრფელად მოგისამძიმროთ თქვენ და მივუსამძიმრო ქართველ ხალხს. საქართველოს, როგორც ახლო მეგობარსა და პარტნიორს მსურს დავუდასტურო გაერთიანებული სამეფოს ურყევი თანადგომა“ - ნათქვამია დევიდ ლიდინგტონის სამძიმრის წერილში.