ლევან ბერძენიშვილი: მთის მინისტრს მოჰყვება თუ არა პიტალო კლდეების დეპარტამენტი, ასეთი საკითხი არ არის

2015-06-11 16:28:15, 525 ნახვა

პოლიტიკა

ევროინტეგრაციის კომიტეტის თავმჯდომარის, ლევან ბერძენიშვილის განცხადებით, მთის საკითხებში სახელმწიფო მინისტრის თანამდებობის შესაძლო შექმნის საკითხი სახუმარო თემად იქცა.
დეპუტატმა იმ ადამიანებს, რომლებიც აღნიშნული ინიციატივის გამო, უმრავლესობას აკრიტიკებენ, საკითხის კარგად გარკვევა ურჩია.
„რეგიონების მაჟორიტარების სამართლიანი გულისტკივილი გამოითქვა, თუ ვინ გამოხატავს მათ ინტერესებს. მოსაზრება სწორედ აქ წარმოიქმნა-ხომ არ უნდა არსებობდეს სახელმწიფო მინისტრი?! მოსახლეობაში ეს საკითხი სახუმარო თემად იქცა და ზოგიერთი ამ საკითხს სერიოზულად ვერ ეკიდება, რადგან არ იცის, თუ რაზეა საუბარი. დაცინვა ყველაფრის შეიძლება, მაგრამ საზოგადოებას მეტი ახსნა-განმარტება სჭირდება. მთის მინისტრს მოჰყვება თუ არა პიტალო კლდეების დეპარტამენტი, ასეთი საკითხი არ არის. ეს ძალიან სერიოზული საკითხია. მთავრობის დაცინვა იოლია, მაგრამ ბუსუსებიანი პრეზერვატივის არ იყოს, კარგია, ვინმე რამეში თუ გაერკვევა და შემდეგ დაიწყებს ხუმრობას, თორემ ხუმრობა ისეთი ვიცით, მთელ საქართველოს გავაცინებთ“,- აღნიშნა ლევან ბერძენიშვილმა.
ცნობისთვის, საპარლამენტო უმრავლესობა ინიციატივით გამოდის, მთის საკითხებში სახელმწიფო მინისტრის თანამდებობა შეიქმნას.
როგორც გია ჟორჟოლიანმა გუშინ ჟურნალისტებს განუცხადა, ახალი აპარატი მთის განვითარების კუთხით იმუშავებს. ჟორჟოლიანის ინფორმაციით, უმრავლესობაში შეთანხმება მიღწეულია, ახლა კონსულტაცია მთავრობასთან მიმდინარეობს.