პოლიტიკის კოორდინაცია, საჯარო ფინანსების მართვა, სახელმწიფო სერვისების განვითარება, ანტიკორუფციული და ღია მართველობის ელემენტები, გამართული ადმინისტრაციული სექტორის ჩამოყალიბება - საქართველოს მთავრობის ადმინისტრაციამ,  ევროკავშირის ექსპერტების დახმარებით, საჯარო მმართველობის რეფორმის სტრატეგია შეიმუშავა.

სტრატეგიის სამოქმედო გეგმა დღეს არასამთავრობო სექტორის და საერთაშორისო ორგანიზაციების წარმომადგენლებმა  განიხილეს.

მთავრობის ადმინისტრაციის უფროსის, მაია ცქიტიშვილის განმარტებით, საქართველოს მთავრობამ, ევროკავშირის ძირითადი პრინციპების გათვალისწინებით და ევროკავშირის ექსპერტების აქტიური ჩართულობით, შეიმუშავა საჯარო ადმინისტრაციის რეფორმის სტრატეგია.

„საქართველოს მთავრობა მუშაობს საჯარო ადმინისტრაციის რეფორმაზე, რეფორმის სტრატეგია დღეს წარვუდგინეთ არასამთავრობო სექტორს. ძალიან მნიშვნელოვანი რეფორმაა, რომელიც გულისხმობს მთლიანად სახელმწიფო მმართველობის რეფორმირებას. მანამდე,  ჩვენ გვქონდა მცდელობა მისი ელემენტების რეფორმა განგვეხორციელებინა.  როგორც იცით, ძალიან აქტიურად მიმდინარეობს საჯარო სამსახურის, ასევე საჯარო ფინანსების რეფორმა და ა.შ. დღეს ჩვენ განვიხილავთ ჩვენს მთელს რეფორმებს ერთიან კონტექსტში, როგორც მთლიანად საჯარო ადმინისტრირების და საჯარო მმართველობის რეფორმებს, რომლებიც რეალურად წარმოადგენენ სახელმწიფო ბიუროკრატიის ქვაკუთხედს. აქედან გამომდინარე, ძალიან მნიშვნელოვანია, რომ ეს ყველაფერი ყოფილიყო ევროინტეგრაციის და ევროკავშირის პრინციპებზე დაყრდნობით, რაც  ევროკავშირის ექსპერტების შეფასებით, გვაქვს სრულად დაცული“, - განაცხადა მაია ცქიტიშვილმა.

ეკონომიკური თანამშრომლობისა და განვითარების ორგანიზაციის (OECD) წარმომადგენელი მარტინს კრიევინსი მიიჩნევს, რომ საქართველოს მთავრობამ  მნიშვნელოვანი ნაბიჯი გადადგა და საჭიროა გაგრძელდეს რეფორმების განხორციელება ევროპულ სტანდარტებთან დასაახლოებლად.

„ჩვენ ერთი წლის განმავლობაში ვეხმარებით საქართველოს ადმინისტრაციას საჯარო მმართველობის რეფორმის შემუშავებაში,რომლის მიზანია ხელი შეუწყოს მთავრობის ევროპულ სტანდარტებთან დაახლოებას. ჩვენი სურვილია, რომ საქართველოს მთავრობამ გააგრძელოს რეფორმების განხორციელება. ასევე, გვინდა დარწმუნებულები ვიყოთ, რომ ყველა ის ნაბიჯი, რასაც საქართველოს მთავრობა გადადგამს, მიმართული იქნება ევროპისკენ“, - აღნიშნა მარტინს კრიევინსმა.

არასამთავრობო ორგანიზიების მიერ გამოთქმული შენიშვნებისა და წინადადებების გათვალისწინების შემდეგ, საბოლოო დოკუმენტს  მთავრობის სხდომა ივნისის თვეში დაამტკიცებს.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

მარგუს ცაჰკნა - ძალიან ვწუხვარ, რომ ქართული რეჟიმი აბსოლუტურად სხვა გზას მიჰყვება, არა ევროკავშირისკენ გზას

16-17 ივნისს თბილი და უმეტესად უნალექო ამინდია მოსალოდნელი, ხოლო 18 ივნისს გაწვიმდება

რუსული ავიაკომპანია Red Wings ბათუმისკენ ფრენებს კიდევ 6 ქალაქიდან შეასრულებს

თენგიზ შარმანაშვილი პოლიციელების მხრიდან ძალადობაზე - კიდევ მოხდება ხვალაც, ზეგაც